Abaı atyndaǵy QazUPÝ-da kórnekti memleket jáne qoǵam qaıratkeri Ahmet Baıtursynulynyń 150 jyldyǵyna arnalǵan ǵylymı-ádistemelik ortalyqtyń ashylý saltanaty ótti, dep habarlaıdy Almaty-akshamy.kz.
Ahmet Baıtursynulyn Ult ustazy dep ataǵany kezdeısoq emes. Atalǵan is-sharanyń uıymdastyrýshysy - Abaı atyndaǵy QazUPÝ Fılologıa ınstıtýty.
Ashylý saltanatyna ýnıversıtet rektory Darhan Bilálov, belgili qoǵam jáne saıası qaıratker, halyq jazýshysy, Qazaqstannyń Eńbek Eri Oljas Súleımenov, A. Baıtursynovtyń jıeni Aıman Baısalova, A. Baıtursynuly atyndaǵy Til bilimi ınstıtýtynyń, M. Áýezov atyndaǵy Ádebıet jáne óner ınstıtýtynyń, A. Baıtursynuly mýzeı-úıi men BAQ ókilderi, belgili ǵalymdar, mádenıet jáne óner qaıratkerleri, ýnıversıtettiń oqytýshylary men stýdent-jastary qatysty.
İs-shara barysynda A.Baıtursynulynyń mýzeı-úıiniń basshylyǵy jańa ortalyqqa Alash qaıratkeriniń 6 tomdyq shyǵarmalar jınaǵyn jáne basqa da kitaptardy tabys etti.
Darhan Bilálov Abaı ýnıversıtetin osyndaı aıtýly oqıǵamen quttyqtap, ortalyqty ashýdyń mańyzdylyǵyna toqtaldy. «Halqymyzdyń rýhanı kósemi, Ult ustazy Ahmet Baıtursynulynyń týǵanyna bıyl 150 jyl tolyp otyr. Abaı ýnıversıtetiniń ujymy úshin Ahmet Baıtursynuly bastaǵan Alash qaıratkerleriniń esimderi qashanda ardaqty. Olardyń qundy murasyn óskeleń urpaqtyń sanasyna sińirý asa mańyzdy. Bul bolashaq mamandardyń boıynda otansúıgishtik pen ultqa adaldyqty qalyptastyrýǵa qyzmet etedi. Ult ustazy qalyptastyrǵan bilim berý dástúri osy ortalyqta zamanaýı talaptarmen qaıta jalǵasyn tabady dep oılaımyn», - dedi.
Oljas Súleımenov Ahmet Baıtursynulynyń bilim jáne ǵylym salasyndaǵy qyzmeti týraly aıta kele, Qazaqstan tarıhyna, onyń qaıratkerlerine, uly tulǵalaryna, zıaly qaýymǵa degen qurmet qajettigin atap ótti.
Osy shara aıasynda «Ahmet Baıtursynulynyń murasy jáne ulttyq qundylyqtar» halyqaralyq ǵylymı-tájirıbelik konferensıa ótti. Oǵan QR Parlamenti Senatynyń músheleri Nurtóre Júsip pen Janarbek Áshimjan, Túrkıa Respýblıkasynyń Bas konsýly Alı Yrza Akyndjy, Neımegen Radbaýd ýnıversıtetiniń profesory Robert Ermers (Nıderlandy Koróldigi), Pomor akademıasynyń rektory Zbıgnev Osadovskıı (Polsha), sheteldik jáne otandyq joǵary oqý oryndarynyń ǵalymdary, «Ahmet. Ult ustazy» telehıkaıasynyń qoıýshy rejıseri Murat Esjan, belgili akter, QR Eńbek sińirgen qaıratkeri, telehıkaıada Ahmettiń rólin somdaǵan Baıǵalı Esenalıev qatysty.
Konferensıa barysynda qazirgi fılologıanyń ózekti máseleleri tarıh prızmasy arqyly talqylanyp, Alash partıasy kósemderiniń murasy: til, rýhanıat, oqytý ádistemesi; Ahmet Baıtursynuly shyǵarmasyndaǵy shyǵystaný, aýdarma máseleleri; pedagogıkalyq muranyń sabaqtastyǵy jáne qazirgi bilim berý prınsıpteri máseleleri qaraldy.
Konferensıa joǵary deńgeıde ótip, barlyq qatysýshylardyń úlken qyzyǵýshylyǵyn týdyrdy.