Endi múgedektik taǵaıyndaý týraly sheshimdi táýelsiz sarapshylar qabyldaıdy
Múgedektikti syrttaı belgileý jobasy Almatyda byltyr qarasha aıynda iske qosyldy. 12 aýrý boıynsha syrttaı kýálandyrý qyzmetin azamattar eldiń basqa óńirlerinde de paıdalana alady. Bul týraly brıfıń barysynda Almaty qalasy boıynsha eńbek, áleýmettik qorǵaý jáne kóshi-qon departamenti basshysynyń orynbasary Gúlnar Qusmanova aıtty, dep habarlaıdy Almaty-akshamy.kz.
Spıkerdiń sózinshe, Almatyda erekshe qajettiligi bar adamdarǵa medısınalyq-áleýmettik saraptama bólimine barýdyń qajeti joq.
Endi múgedektik taǵaıyndaý týraly sheshimdi táýelsiz sarapshylar qabyldaıdy.
«Erekshe qajettiligi bar adamdarǵa endi memlekettik qurylymdarǵa barýdyń, qujattar paketin jınaýdyń qajeti joq. Meduıymdar men medısınalyq-áleýmettik saraptama bólimsheleri arasynda elektrondy qujat aınalymy qamtamasyz etilgen, bul merzimdi aıtarlyqtaı qysqartýǵa kómektesedi, múgedekterdi artyq anyqtamalardan qutqarady jáne olarǵa elektrondy túrde júginýge jáne nátıje alýǵa múmkindik beredi», - dedi ol.
Almatyda pılottyq joba ótken jyldyń qarasha aıynda 12 aýrý boıynsha iske qosyldy. Bul rette syrttaı kýálandyrý qyzmetin eldiń basqa óńirlerinde de paıdalana alady.
«Birinshi aıda jobaǵa jeti medısınalyq uıym qosyldy. Búgingi tańda bizben 39 memlekettik medısınalyq uıym jáne 31 jeke medısınalyq ortalyq jumys isteıdi. Sonymen qatar, 1 naýryzdaǵy jaǵdaıǵa sáıkes respýblıka boıynsha syrttaı kýálandyrýǵa 19 546 ótinim jiberildi. 2022 jyldyń basynan beri Almatyda múgedektikti syrttaı belgileý qyzmetin 2 515 adam aldy», - dedi Almaty qalasy boıynsha eńbek, áleýmettik qorǵaý jáne kóshi-qon departamenti basshysynyń orynbasary.
Gúlnar Qusmanova bolashaqta syrttaı kýálandyrýdan ótýge bolatyn aýrýlar tizimi keńeıtiletinin atap ótti.