Qazaqstandyqtar eGov portalynyń keshki ýaqytta jáne demalys kúnderi istemeı qalatynyna jıi shaǵym aıtýda.
Sıfrlyq úkimetti qoldaý ortalyǵynyń bas dırektory Rústem Bıǵarıdyń túsindirýinshe, azamattar elektrondyq úkimet portalyna az kiretin ýaqyt tehnıkalyq jumystar júrgiziledi, dep habarlaıdy Almaty-akshamy.kz.
Ol sondaı-aq beıindi vedomstvo kelip túsken shaǵymdardyń sanyn zerdeleıtinin jáne tehnıkalyq jumystar júrgiziletin kúnderi qazaqstandyqtardyń eGov portalyna qanshalyqty jıi júginetinin taldaıtynyn atap ótti.
"Kez kelgen kompanıa ádette tehnıkalyq jumystardy túnde nemese demalys kúnderi júrgizedi. Tehnıkalyq qoldaý jumystaryn UAT AQ atqarady , olar demalys kúnderi adam az kiretin ýaqytty tańdaǵan bolýy múmkin. Meniń de portalǵa kire almaı qalǵan sátterim boldy", – dedi Bıǵarı brıfıń barysynda.
Sonymen qatar, sıfrlyq úkimetti qoldaý ortalyǵynyń basshysy árbir vedomstvonyń sıfrlyq transformasıalaý jospary bar ekenin atap ótti.
Retteý barysynda olqylyqtar, normatıvtik jáne tehnıkalyq máseleler bar, sonyń saldarynan elektrondyq úkimet saıty jumys istemeı qalady.
"Qazir bizde eGov-da derek óte kóp. Jáne olarǵa únemi suranys túsedi. Iaǵnı, demalys kúnderi azamattar qandaı da bir mámile jasaǵysy keledi nemese anyqtama alǵysy keledi. Sondyqtan, biz jeke egjeı-tegjeıli jospar aıasynda osy máselelerdi qarastyryp, reınjınırıng jasaımyz", - dep tolyqtyrdy Rústem Bıǵarı.
Ol “UAT” AQ demalys kúnderi qazaqstandyqtardyń suranystarynyń sanyn taldaıtynyn jáne tehnıkalyq jumystardy jumys kúnine aýystyrýy múmkin ekenin atap ótti.