Almatydaǵy órtterdiń shyǵýyna eki sebep qarastyrylyp otyr
Almaty qalasyndaǵy Keńsaı zıraty aýmaǵynda bolǵan órtke qatysty qylmystyq is qozǵaldy. Bul týraly qalalyq Tótenshe jaǵdaılar departamenti basshysynyń orynbasary Samat Asaınov málim etti, dep habarlaıdy Almaty-akshamy.kz QazAqparatqa silteme jasap.
«Keshe Almatydaǵy Keńsaı zıraty aýmaǵynda órt shyqty. Qazirgi ýaqytta Medeý aýdandyq prokýratýra qyzmetkerleri QR Qylmystyq kodeksiniń 204-baby 2-bóligine sáıkes qylmystyq is qozǵady. Qazir tergeý jumysy júrip jatyr», - dedi Samat Asaınov Ortalyq komýnıkasıalar qyzmeti alańynda ótken baspasóz máslıhatynda.
Qalalyq TJD basshysy orynbasarynyń aıtýynsha, órt saldarynan adamdar zardap shekken joq jáne materıaldyq shyǵyn kelmegen.
Sondaı-aq Almatydaǵy órtke baılanysty QR Tótenshe jaǵdaılar mınıstrligi órtke qarsy qyzmet komıteti tóraǵasynyń orynbasary Dmıtrıı Tıtov túsinik berdi.
«Almatydaǵy órtterdiń shyǵýyna eki sebep qarastyrylyp otyr. Biri – órt abaısyzda shyǵýy múmkin nemese órt qaýipsizdigi erejesin buzý. Eki jaǵdaı boıynsha tótenshe jaǵdaılar jáne ishki ister mınıstrligi qyzmetkerleri anyqtaý jumysyn júrgizedi. Eger kináli tulǵalar anyqtalsa, olar jaýapqa tartylady», - dedi TJM ókili.
Buǵan deıin brıfıń barysynda Keńsaı zıratyndaǵy órtten 60 molaǵa zalal kelgeni aıtyldy.
Eske sala ketsek, Almatydaǵy taý bókterinde qýraǵan shóp órtengeni týraly habarlaǵan bolatynbyz.
Odan bólek, Kóktóbeden de órt shyqqan edi.