Sol kezde Ahmet Baıtursynuly eki komısıaǵa múshe bolǵan
«Ahań júrip ótken jolmen» ekspedısıasynyń nátıjesinde Ahmet Baıtursynulynyń vıdeosy tabyldy. Mundaı jańalyqpen ǵylymı ekspedısıanyń múshesi Abylaı Maýdanov bólisti, dep habarlaıdy Almaty-akshamy.kz QazAqparatqa silteme jasap.
«Ahań júrip ótken jolmen» ekpedısıasy aıasynda Ahmet Baıtursynulynyń tabany tıgen jerlerdiń barlyǵyna jolǵa shyqtyq. Onyń ishinde Bakýge de bardyq. Onda Túrkologtardyń búkilodaqtyq İ sezi ótken ǵımaratqa soqtyq. Degenmen olar bizge qaǵazǵa túsirilip, ǵalamtorǵa jarıalanyp, kitapqa engen barshaǵa belgili derekterdi ǵana usyndy. Biraq aýdıo jáne beınematerıaldar saqtalmaǵan eken. Keıin Ázirbaıjan ulttyq-ǵylymı ortalyǵynyń qyzmetkerimen baılanysyp kórdik. Olar vıdeolar bar ekenin jetkizdi. Alaıda, ony alý úshin resmı hat jazý kerek boldy. Biz ekspedısıadan soń elge oralyp, hat jazýǵa kiristik. Nátıjesinde atalǵan ortalyq bizge uzaqtyǵy 7 mınýt 55 sekýnd bolatyn beınematerıaldy joldady. Vıdeonyń ishindegi bir kadr kózge shalyndy. Taspaǵa syrt kelbeti Ahmet Baıtursynulyna uqsaıtyn adam túsirilgen eken», - dedi ekspedısıa múshesi Abylaı Maýdanov.
Onyń aıtýynsha, beınematerıaldaǵy adamnyń Ahmet Baıtursynuly ekenin rastaý úshin vıdeo alashtanýshy jáne ahmettanýshy ǵalymdarǵa joldanǵan. Olardyń barlyǵy bir sekýndtyq kadrda kórsetilgen azamattyń Ult ustazy ekenin rastapty.
«Ahmettanýshylardyń aıtýynsha, sol kezde Ahmet Baıtursynuly eki komısıaǵa múshe bolǵan. Sondyqtan ol prezıdıýmda otyrýǵa ábden laıyq. Vıdeony qarasańyz, ol aldyńǵy qatarda otyr. Bul sol kezdegi Ahańnyń bedeldi, tanymal kisi bolǵanyn aıǵaqtaıdy. Keıin, 31 tamyz kúni, beınematerıaldy Qostanaıdaǵy sot-saraptama ınstıtýtyna apardyq. Olar: Vıdeodaǵy adamnyń sulbasy 1926 jylǵy túsken Ahmet Baıtursynulynyń sýretine uqsaıdy, degen jaýap berdi», - dep jumystardyń nátıjesimen bólisti Abylaı Maýdanov.
«Ahań júrip ótken jolmen» ǵylymı ekspedısıasynyń nátıjesinde Ult ustazynyń ómiri men atqarǵan eńbegi týraly tyń derekter jınaqtalyp, qujattar óńirlik murajaıǵa tabystalǵan. Sondaı-aq, Ahmet Baıtursynulynyń týǵan jeri Torǵaıda ótetin 150 jyldyq mereıtoıy aıasynda kórsetiletin derekti fılm ázirlendi.