Onyń ishinde 13 mal qaǵý deregi anyqtalǵan
Almaty oblysynda jyl basynan beri 1113 jol kólik oqıǵasy bolyp, 210 adam qaza tapqan. Onyń ishinde 13 mal qaǵý deregi tirkelip, 20 adam jaraqat alǵan, dep habarlaıdy Almaty-akshamy.kz Almaty.tv-ge silteme jasap.
Respýblıkalyq mańyzy bar tasjolda jáne qalaǵa qatynaıtyn iri jol jıeginde qaraýsyz jaıylyp júrgen iri-qaranyń da sany artty, - deıdi polısıa qyzmetkerleri. Al júrgizýshiler jol apatyna sebep bolǵan mal ıelerin jaýapqa tartý kerek dep otyr.
Jylqysy jol jıeginde qaraýsyz júrse de, jaýapkershilikten qashpaq bolǵan mal ıeleri kinásin birden moıyndaı qoımady. Tek beınekameradan kórip, únsiz kónýge májbúr boldy. Árıne, zań bárine ortaq.
«Qaraýsyz júrgen tórt túlik jolǵa shyǵyp ketýi múmkin. Osyndaı jaǵdaı oryn almas úshin mal baǵatyn adamdardy qatań baqylaýǵa alyp, aıyppul salý kerek», – dedi kólik júrgizýshisi Álibek Qalımoldın.
«Bul jerde de sıyrlar men jylqylar kóp júredi. Sondyqtan mal baǵatyndar, malyn qaraýsyz qaldyrmaý kerek», – dedi kólik júrgizýshisi Dáýrenbek Qanalıev.
Alaıda mal ıeleri bul aımaqta jaıylym jerlerdiń joqtyǵyn atap ótti. Sondyqtan amalsyz jol jıegimen aıdap ótetinderin alǵa tartady. Biraq qaraýsyz qalǵan tórt túliktiń tasjolǵa shyǵyp ketkenin joqqa shyǵarmaıdy.
«Almaty-Besmoınaq tasjolynda júrgen maldardyń ıesin anyqtap, QR ákimshilik quqyq buzýshylyq kodeksiniń 408-baby 1-bóligi boıynsha hattama toltyryp bárine aýyzsha eskertip kettik», – dedi Qarasaı aýdany İİB ýchaskelik polısıa ınspektory Ernar Ońǵarbaev.
Búgingi reıd jumystary barasynda ákimshilik quqyq buzǵan on shaqty azamatqa aıyppul salynyp, jol jıegimen mal aıdap ótkenderge eskertý jasaldy. Sonymen qatar polısıa qyzmetkerleri arnaıy mal aıdap ótetin belgiler bar jerlermen, arnaıy ótkeldermen joldy kóldeneń kesip ótýge ruqsat baryn aıtady.