Ulytaý oblysyndaǵy Keńgir sý qoımasy memleket menshigine qaıtarylady.
Bul týraly oblys turǵyndarymen kezdesý barysynda Sý resýrstary jáne ırrıgasıa mınıstri Nurjan Nurjigitov málimdedi, dep habarlaıdy aqshamnews.kz Sý resýrstary men ırrıgasıa mınıstrligine silteme jasap.
Búgingi tańda sý qoımasyn memleketke qaıtarý prosesi aıaqtalýǵa jaqyn. Nysan osy jyldyń sońyna deıin Sý resýrstary jáne ırrıgasıa mınıstrliginiń «Qazsýshar» respýblıkalyq kásipornynyń balansyna kóshýi tıis.
Keńgir – Ulytaý oblysyndaǵy eń iri sý qoımasy. Onyń jalpy kólemi 319 mıllıon tekshe metr.
«Keńgir sý qoımasy aımaqtaǵy sýdyń negizgi kózi bolyp tabylady. Jergilikti turǵyndar sýdyń sapasyna, onyń tıimsiz paıdalanylýyna jáne ekologıalyq máselelerge alańdaýshylyq bildirip otyr. Nysandaǵy gıdrotehnıkalyq qurylystar apatty jaǵdaıda. Sý qoımasyn memleket menshigine qaıtarǵannan keıin biz qordalanǵan máselelerdi sheshý úshin eń aldymen kóp faktorly zertteý júrgizemiz», – dedi Sý resýrstary jáne ırrıgasıa mınıstri Nurjan Nurjigitov.
Sondaı-aq, Ulytaý oblysynyń turǵyndary mınıstrge óńirdi aýyz sýmen qamtamasyz etý, aýyz sýdyń sapasyn jaqsartý, jerasty sý qubyrlaryn jóndeý jáne jergilikti sý aıdyndarynyń ekologıalyq jaǵdaıy týraly suraqtaryn qoıdy.