Búgin Oqý-aǵartý mınıstri Halyqaralyq uıymdastyrý komıtetiniń ókilderimen kezdesti.
IBO halyqaralyq uıymdastyrý komıtetiniń tóraǵasy Lenka Lıbýsovanyń aıtýynsha, Qazaqstannyń mundaı bedeldi olımpıadany ótkizý orny retinde tańdalýy kezdeısoqtyq emes, oǵan qazaqstandyq oqýshylardyń joǵary halyqaralyq ımıj qalyptastyrýy sebep boldy, dep habarlaıdy Almaty-akshamy.kz Oqý-aǵartý mınıstrligine silteme jasap.
«Jyl saıyn qazaqstandyq oqýshylar álemdik arenada joǵary kórsetkishterdi kórsetip keledi. Barlyq jetistikterdi eskere otyryp, Halyqaralyq uıymdastyrý komıteti bıologıa páninen ótetin halyqaralyq olımpıadany 2024 jyly Astanada ótkizý týraly sheshim qabyldady. 80 elden 330-ǵa jýyq eń úzdik jas bıolog qatysady dep kútilýde», - dedi olımpıadanyń Halyqaralyq uıymdastyrý komıtetiniń tóraǵasy.
Oqý-aǵartý mınıstri mundaı aıtýly sharanyń ótkizilýi – elimizdiń búkil oqý-aǵartý salasynyń jetistigi ári bedeli ekenin aıtty.
«Qýantarlyǵy, osyndaı bedeldi álemdik olımpıadalarda bizdiń oqýshylarymyzdyń reıtıńi jyl saıyn ósip keledi. Bilim salasyndaǵy eń iri sharalardyń biri – bıologıadan halyqaralyq IBO–2024 olımpıadasynyń bizdiń elde ótýi sonyń dáleli bolmaq. Bul bilim berý sapasyn arttyrýǵa jasalatyn taǵy bir qadam», – dedi Ǵanı Beısembaev.
Bıologıadan halyqaralyq olımpıada (IBO) - túrli elderdegi orta bilim berý uıymdarynyń oqýshylary arasyndaǵy eń joǵary deńgeıdegi jarys sanalady. Maqsaty – bıologıalyq zertteýlerge qyzyǵýshylyqty arttyrý, daryndy oqýshylardyń ıdeıalaryn nasıhattaý jáne ózara tájirıbe almasýlaryna múmkindik jasaý.