Pıanıs ári kompozıtor Karına Izmaıylova ata-ájesi Ǵazıza Jubanova men Ázirbaıjan Mámbetovtiń Keńsaıdaǵy beıitinde urlyq jasalǵanyn aıtty.
Karına Izmaıylovanyń sózinshe, KSRO Halyq ártisteri, kompozıtor Ǵazıza Jubanova men rejıser Ázirbaıjan Mámbetov jerlengen Keńsaı zıratynan 2016 jyly eskertkishter urlanǵan. Úsh jasynda qaıtys bolǵan olardyń kenje uly Ahannyń qabirindegi eskertkish, ıaǵnı qoladan jasalǵan qulynnyń músini ǵana urlanbaǵan. Bul otbasy sol kezde óz qarajatynan eskertkishterdi qalpyna keltiripti. Biraq urylar tabylmaǵan. Birneshe kún buryn qabirde taǵy da urlyq jasalǵan. Bul joly uly tulǵalardyń kenjesiniń qabirinde turǵan qulynnyń músini urlanǵan, dep habarlaıdy Almaty-akshamy.kz.
«Biz úshin bul tragedıa deýge bolady. Biraq bárinen buryn uly qaıratkerler Ázirbaıjan Mámbetov pen Ǵazıza Jubanovanyń óz kúshimizben qalpyna keltirgen eskertkishterin urlap kete me dep qorqamyz. Munyń bári bizdiń otbasymyz úshin, osy uly adamdardyń urpaqtary úshin soqqy bolyp tıip otyr. Onyń ústine osyndaı eń qasıetti jer - zıratta urlyq jasaýǵa batyly barǵandary tańǵaldyrady. Keńsaı zıratynyń basshylyǵyna, Almaty qalasy ákimdigi men prokýratýrasyna myna suraqpen júginemiz: Otanyna eren eńbegi sińgen adamdar jerlengen ortalyq zırat nege durys qorǵalmaıdy?»- deıdi Karına Ysmaıylova áleýmettik jelidegi jazbasynda.
Karına eskertkishter Keńsaı zıratynyń ortalyǵynda, kúzet beketi men moldanyń úıiniń mańynda ornalasqanyn aıtty. Polısıa marqumdardyń týystarynyń ótinishin qabyldapty. Biraq kinálilerdi tappaǵan. Zırat basshylyǵy men ákimdik bar máseleni jeke kúzet uıymyna siltep otyr eken.
Almaty ákimdigi málimetinshe, "Mamandandyrylǵan ǵuryptyq qyzmetter kombınaty" JSHS qala zırattaryn kútip ustaý qyzmetin kórsetedi. Jerleý qaǵıdasy boıynsha jerleýge bólingen ýchaske aýmaǵyndaǵy qurylystar týystarynyń nemese olardy belgilegen mekemelerdiń menshigi sanalady eken. Iaǵnı, JSHS olarǵa jaýapty emes.
Al Almaty qalasy Jetisý aýdany ákiminiń apparaty jerleý oryndaryn kútip ustaý jáne zırattardy kúzetý jónindegi búdjettik baǵdarlamanyń ákimshisi sanalady. "SKRÝ" JSHS jyl saıyn Jetisý aýdany ákiminiń apparaty ótkizetin konkýrs negizde memlekettik satyp alý shartyna sáıkes qyzmet kórsetedi. Aýdan ákimdigi jerleý oryndaryn kúzetýge konkýrs ótkizedi. Zırattardy kúzetý qyzmetin jeke kúzet agenttigi kórsetedi. 2023 jyly Star Wolf Security JSHS kúzetedi.
«Sonymen qatar, keıingi jyldary Almaty qalasy zırattarynda vandalızm, urlyq derekteri kóbeıgen. Kúzetke bólingen qarajat eki beket boıynsha ǵana eseptelgen. Qorǵalatyn nysannyń jalpy aýdany 197,2 gektar bolǵandyqtan, barlyq jerdi baqylaýda ustaý múmkin emes. Degenmen zırattar men kúzet uıymynyń qyzmetkerleri birneshe ret urlyq derekteriniń jolyn kesip, birneshe ret qylmyskerler ustalyp, polısıa qyzmetkerlerine tapsyryldy», - dedi ákimdik ókili.
2024 jyly túnde zırat ishine qosymsha kúzet jáne patrúldeý beketterin qosý arqyly kóbirek qarjy bólý josparlanyp otyr eken. Sonymen qatar, Jetisý aýdanynyń ákimdigi 750 kamera ornatpaq. Sonyń ishinde "Keńsaı 1"jáne "Keńsaı 2" zırattaryna ornatý josparlanyp otyr. Bul úshin Almaty Sıfrlandyrý basqarmasyna ótinim jiberilipti.
Al Almaty Polısıa departamenti málimetinshe, bul derekke qatysty Medeý aýdanynyń polısıa basqarmasy janyndaǵy polısıa bólimi QR Qylmystyq kodeksiniń 188-baby (bótenniń múlkin urlaý) boıynsha sotaldy tergeý júrgizip jatyr. Arnaıy jedel tergeý toby qurylǵan. Sonymen qatar, metaldy qabyldaý oryndary tekseriletini aıtyldy.
Quzyrly organdar málimetinshe, jyl basynan beri Keńsaıda urlyq jasady degen kúdikpen úsh adam ustalypty.