Keler jyly 175 myń jasóspirim qyz papılloma vırýsyna qarsy egiledi.
Vaksınalaý ulttyq ekpe kestesine engizildi, dep habarlaıdy Almaty-akshamy.kz.
Bul týraly búgin densaýlyq saqtaý mınıstrligi habarlady. Ekpe eki kezeńnen turady. Birinshisi qyz bala 11 jasqa tolǵanda, ekinshisi bir jyldan keıin jasalady. Vaksınalaý ata-anasynyń ruqsatymen ǵana júrgiziledi. "Adam papılloma vırýsy" jatyr moıny qaterli isigin týdyratyn qozdyrǵysh. Sondyqtan álemniń 130-ǵa jýyq memleketinde osy vırýsqa qarsy ekpe turaqty túrde júrgiziledi.
Sonyń ishinde Grýzıa, Túrkimenstan, Armenıa, Ózbekstan jáne Qyrǵyzstan elderi bar. Al bizde 2013-2015 jyldary Astana, Aqtóbe, Pavlodar, Almaty óńirlerinde pılottyq baǵdarlama engizilip, vaksına salyndy. Sol kezeńde 17 myńnan astam qyz balaǵa birinshi dozasy engizildi. Vaksınalaýdy tolyq, ıaǵnı eki bóligin 11 myńnan astam qyz bala qabyldady. "10 jyldan keıin pılottyq joba oń nátıje berdi" deıdi mamandar.
«Bizde 11 jastaǵy qyz balalar eki dozaly 4 valentti gardasıl vaksınasyn engizý osy 2024 jyldan bastap engiziledi. 11 jastan bastap qabyldaıdy mektepte. Uıymdastyrý jumystary júrgiziledi, túsindiredi. Tegin. Ekinshi dozasy 12 aıdan keıin. On jyl ishinde Eýropada damyǵan elderde óz nátıjelerin berdi. Eshqandaı bedeýlik ákelgen joq. Vırýs organızmge engenge deıin jasaǵanymyz durys. Óıtkeni bala jynystyq qatynasqa túskenge deıin jasasaq, denesinde antıdeneler paıda bolady», - deıdi QR Ǵylymı zertteý ınstıtýtynyń joǵary sanattaǵy onkogınekology Tolqyn Sadyqova.
«Qazaqstan Úkimetiniń jatyr moıny qaterli isigine qatysty problemany moıyndap, vaksınalaýǵa daıyndyq júrgizip jatqanyna alǵys bildiremiz. Qazir bul dertpen kúreste, adam papılloma vırýsyna qarsy ekpe jasaý óte mańyzdy. Osy naýqan barysynda barlyq aqparat halyqqa qoljetimdi bolý kerek. Eger ata-analarda nemese balanyń jaqyndarynda suraq týyndasa, dárigerler men medısısna mamandary oǵan jaýap berip, júıeli jumys júrgizgeni abzal. Mysaly Avstralıada adam papılloma vırýsyna qarsy ekpe 20 jyl buryn bastaldy. Sodan beri ol óńirde týǵan birde bir áıelde jatyr moıny qaterli isigi anyqtalǵan joq», - deıdi DDSU Eýropalyq aımaqtyq búrosy, densaýlyq saqtaýdy saqtandyrý baǵdarlamalary bóliminiń aımaqtyq keńesshi Sıddarta Datta.