Úıtas-Aıdos sý qubyrynyń qurylysy 2025 jyly aıaqtalady.
Al Jezqazǵan qalasyna Esqula qubyrymen sý tartý 2023 jyly bastalady. Ulytaý oblysynyń ákimi Prezıdentke osylaı dep málimdedi, dep habarlaıdy Almaty-akshamy.kz
Berik Ábdiǵalı óńirde turǵyn úılerdiń 33 paıyzy eskirgenin aıtty. Qazir úıdi jańartý baǵdarlamasy júzege asyrylyp jatyr. Bıyl jáne keler jyly qalanyń jańa aýdanynda kóp qabatty 20 turǵyn úı salynady.
Memleket basshysy, eń aldymen, halyqtyń turmys sapasyn jaqsartý qajet ekenin eskertti. Qasym-Jomart Toqaev Úkimet pen oblys ákimdigine jol máselesine, ekologıaǵa, bilim salasyn damytýǵa kúsh salýdy tapsyrdy.
Al bıznestiń áleýmettik jaýapkershiligi turǵysynan «Qazaqmys» bıyl 25,4 mıllıard teńge bólgen.
"Áleýmettik máseleler sheshimin tabýǵa tıis. «Qazaqmys» kompanıasyn osy iske belsendi túrde atsalysýǵa shaqyramyn. 25,4 mıllıard teńge mundaı aýqymdy jumystar úshin jetkiliksiz bolýy múmkin. Qarjyny ulǵaıtý múmkindigin qarastyrǵan jón. Áleýmettik nysandardyń qurylysyna kómektesý qajet. Sport ǵımarattary kerek. Jergilikti halyq úlken úmit artyp otyr. Osy turǵydan alǵanda qaladaǵy jaǵdaıdy jaqsartýymyz kerek. Árıne, mádenı nysandarǵa da erekshe kóńil bólinýi qajet", - dedi Qazaqstan Respýblıkasynyń Prezıdenti Qasym-Jomart Toqaev.