Bıyl «Ulttyq mıneraldy resýrstar banki» aqparattyq júıesi paıdalanýǵa beriledi.
Mınıstr atap ótkendeı, júıe ınvestorlardy tartýǵa múmkindik beredi, dep habarlady Almaty-akshamy.kz. QR Ekologıa, geologıa jáne tabıǵı resýrstar mınıstrliginiń saıtyna silteme jasap.
Bul saladaǵy negizgi máselelerdiń biri - qorlardyń tómen deńgeıde tolyqtyrylýy bolyp tabylady. Búgingi kúni paıdaly qazbalar ósiminiń qatty paıdaly qazbalar boıynsha olardy óndirý kólemine araqatynasynyń koefısıenti orta eseppen - 0,13, al kómirsýtek shıkizaty boıynsha - 0,9 quraıdy. Sonymen qatar Qazaqstanda kómirsýtekter jáne QPQ boıynsha da úlken perspektıvalar bar.
«Memleket basshysynyń tapsyrmasymen biz geologıa salasyn damytýdyń 2021-2025 jyldarǵa arnalǵan ulttyq jobasyn ázirleýge kiristik. Tolyq zerttelmegen shógindi baseınderdiń munaı-gaz áleýetin anyqtaý jáne taý-ken aýdandary shegindegi «tereń gorızonttardy» zertteý kózdelip otyr. Jobany iske asyrý aýmaqty zertteýge, paıdaly qazbalardyń boljamdy resýrstaryn baǵalaýǵa múmkindik beredi. Sondaı-aq geologıalyq barlaý jumystary kezinde halyqty jumyspen qamtýǵa, ınvestısıalar tartýǵa jáne taý-ken baıytý kombınattaryn salý men paıdalaný kezinde jańa jumys oryndaryn qurýǵa múmkindik beredi. Bul óz kezeginde óńirdiń áleýmettik máselelerin sheshýge septigin tıgizedi», - dedi Maǵzum Myrzaǵalıev.
Geologıalyq aqparattyń elektrondyq bazasyna qol jetkizý memlekettik organdar men jer qoınaýyn paıdalanýshylardyń ózara qarym-qatynasyn sıfrlyq formatqa kóshirýge múmkindik beredi. 2020 jyly barlaý/óndirý, geologıalyq aqparatty satyp alýǵa lısenzıalar berý sekildi birqatar bıznes-prosester ázirlendi, memlekettik derekter bazasymen ıntegrasıalar júrgizildi.