Elimizde ıod, korvalol, menovazın, brıllıant jasyly men valerıana syǵyndysy qymbattaýy múmkin.
Óıtkeni jańa jyldan bastap osy dári-dármektiń quramyna kiretin etıl spırtine aksız salyǵy salynady. Bul týraly almaty-akshamy.kz habarlaıdy KTK arnasyna silteme jasap.
"Atameken" UKP Medısınalyq qyzmet departamentiniń basqarýshy dırektory Nazgúl Qabdyrahmanovanyń boljaýynsha, qazir tıyn-teben turatyn bul preparattardyń baǵasy 30, tipti 100 paıyzǵa ósedi.
25 mıllılıtr qutysy 100-200 teńge aralyǵynda satylatyn ıod, sol aralyqta turatyn korvalol tamshylary endi eki ese qymbattap shyǵa kelýi múmkin. Óıtkeni medısınalyq taza spırttiń lıtrine salynatyn aksız kólemi 600 teńge, spırt tunbasyna 2 jarym myń teńge. Al bizdiń naryqta Reseı men Belarýsta óndirilgen dál osy dáriler áldeqaıda arzanyraq. Óıtkeni bul memleketterde naqty osy preparattarǵa aksız salyǵy joq eken. Sondyqtan tutynýshy álbette básekelester shyǵarǵan qoljetimdisin tańdaıtynyn aıtady. Sondyqtan otandyq farmasevtter óndiris kólemin azaıtyp, jumys oryndaryn da qysqartýyna týra keledi deıdi.
"Dárilik zattar men medısınalyq ónimderdi óndirýde qoldanylatyn etıl spırtine aksız salynady. Aksız salý, quramynda alkogól paıdalanylatyn ónim baǵasynyń qatty ósýine ákep soǵady. Búginde osyndaı 130-ǵa jýyq taýar bar. Otandyq ónimder óndiriste qoldanylatyn alkogól mólsherine baılanysty 30-dan 100 paıyzǵa deıin qymbattaýy múmkin", - deıdi Nazgúl Qabdyrahmanova.