Qazaqstan jol ǵylymı-zertteý ınstıtýtynyń ǵalymdary amerıkalyq normatıvtik bazamen tanysý jáne jol qurylysy salasyndaǵy yntymaqtastyqty nyǵaıtý maqsatynda Amerıka Qurama Shtattaryna jumys saparymen bardy.
Atap aıtqanda, olar Pensılvanıa shtatyndaǵy American Society for Testing and Materials (Amerıkalyq synaqtar jáne materıaldar qoǵamy) Halyqaralyq uıymynyń shtab-páterinde boldy, dep habarlaıdy Almaty-akshamy.kz QR Kólik mınıstrliginiń resmı saıtyna silteme jasap.
Jumys sapary barysynda QazjolǴZI vıse-prezıdenti Erik Ámirbaev, ǵylymı-zertteý ortalyǵynyń dırektory Ásel Nuǵmanova, avtomobıl joldary jáne kópir qurylystary basqarmasynyń basshysy Qaısar Shalqar ASTM International dırektory Djım Olshevskıımen, sondaı-aq kompanıanyń jol salasy boıynsha sarapshylarymen kezdesti.
Atap aıtqanda, ASTM International materıaldarǵa, ónimder men júıelerge, sonymen birge qyzmetterge arnalǵan erikti standarttardy ázirleýmen jáne shyǵarýmen aınalysady. Amerıkalyq kompanıada qazaqstandyqtar álemniń 60 elinde normatıvtik bazalardyń negizi retinde alynǵan AQSH-tyń 5 myńnan astam jol salasyndaǵy standarttarymen tanysty.
«Amerıkalyq jol standarttary 5 jylda bir ret tekserilip, qaıta shyǵarylady. Búgingi tańda materıaldardyń, taýarlar men qyzmetterdiń sapasyn arttyrýǵa, qaýipsizdikti kúsheıtýge jáne naryqqa shyǵýyna yqpal etýge arnalǵan 12 myńǵa jýyq ASTM standarttary búkil álemde qoldanylady. Olardyń praktıkalyq nusqaýlaryn ónerkásip pen kóptegen eldiń úkimetteri paıdalanady. ASTM-niń baı tájirıbesi QazjolǴZI júrgizip jatqan Qazaqstannyń jol salasynyń normatıvtik bazasyn reformalaý boıynsha jumystary barysynda paıdaly bolýy múmkin», dep atap ótti Ásel Nuǵmanova.
Esterińizge sala keteıik, Memleket basshysy Qasym-Jomart Toqaev Qazaqstan halqyna Joldaýynda 2029 jylǵa deıin joldardyń sapasyn arttyrýdy tapsyrǵan bolatyn. Ol úshin basqa da mindettermen qatar Úkimet jol salasynyń qoldanystaǵy normatıvtik bazasyn sáıkestendirýi tıis.
Osy rette QR Kólik mınıstrligi salalyq normatıvtik qujattardy ózektendirý men reformalaýdy Qazaqstan jol ǵylymı-zertteý ınstıtýtyna tapsyrdy. Instıtýt táýelsiz jol sarapshylarynyń qatysýymen tehnıkalyq keńestiń otyrystaryn ótkizdi. Sonyń nátıjesinde búgingi tańda 400-den astam GOST, 200-ge jýyq standarttar jáne 300-ge jýyq vedimistik normatıvtik-tehnıkalyq qujattar qaıta qaraldy.