Almaty ákimi Erbolat Dosaev baraholka bazary boıyna kólikterdiń beıbereket toqtaýyna qatysty pikir bildirdi, dep habarlaıdy Almaty-akshamy.kz Tengrinews.kz-ke silteme jasap.
Jetisý aýdanynyń turǵyndarymen kezdesýde almatylyqtardyń biri megapolıs basshysyna júgindi. Ol aqshany únemdeý maqsatynda ámbebap bazarlardyń aqyly turaǵyna kirmeı, Soltústik aınalma tasjoly boıyna toqtap, kólikterin qoıatyn júrgizýshilerge shara qoldanýdy surady.
«Soltústik aınalma joldyń boıynda Jumabaev kóshesinen "Kókmaısa" yqshamaýdanyna deıin tórt bazar ornalasqan: «Kenjehan», «Qazyna», «Arlan» jáne «Alash». Byltyr bul tasjolǵa jóndeý jumystary júrgizilip, bordúrler ornatyldy. Biraq qazir júrgizýshiler birinshi jolaqtan turaq jasap alǵan: 200 teńge únemdeıdi, bazardyń turaǵyna kirmeıdi. Osyǵan baılanysty bul kóshede únemi keptelister bolady», - dep ashýlandy er adam.
Buǵan jaýap retinde Erbolat Dosaev polısıa men sıfrlandyrý qyzmetkerlerine erteńnen bastap shara qoldanýdy tapsyrdy. Atap aıtqanda, polıseıler belgilengen aýmaqty tańerteń jáne keshke tekserip, ákimdik qyzmetkerleri ol jerge "Sergek" kameralaryn ornatýy kerek.
«Arystanǵanı Rasylhanuly (Zapparov - Almaty polısıa departamentiniń bastyǵy - esk.), bóleıik. Men qazir tapsyrma beremin, kórsetilgen aýmaqqa bir «Sergek» kamera keshenin ornatyńyz. Taksı júrgizýshileri ol jerde avtoturaq jasap alsa, endi azdaǵan aıyppul tólesin.
Aqsha bar dep oılaımyn, aldaǵy eki aıda kameralar ornatamyz. Sondaı-aq, taksı júrgizýshilerimen jumys júrgizińizder. Jergilikti polısıa qyzmeti nege jumys istemeıdi? Tańerteń jáne keshke bir patrúl kóligin sonda qoıyńyzdar. Báribir qalany aralap júredi, aıyrmashylyǵy nede? Erteńnen bastap patrúl qoıyńyz, «Sergek» ornatylǵannan keıin patrúldi alyp tastaýǵa bolady», - dedi Almaty ákimi.