BUU júkti áıelder óliminiń jıilegeni jaıly osyndaı derek keltirdi.
2000-2015 jyldar aralyǵynda ana ólimi aıtarlyqtaı qysqarǵan edi. Alaıda 2016 jyldan bastap kórsetkishter qaıta nasharlaǵan, dep habarlaıdy Almaty-akshamy.kz 24.kz-ke silteme jasap.
Buǵan sapaly medısınalyq kómektiń qoljetimsizdigi sebep. Statısıkaǵa súıensek, áıelderdiń úshten biri bosanýǵa deıingi tekserýlerdiń jartysynan da ótpeıdi nemese bosanǵannan keıin negizgi medısınalyq kómek ala almaıdy. Sonyń saldarynan 2020-shy jyly álemde 287 myń ólim tirkelgen.
Qaıǵyly oqıǵalardyń deni kedeı elderde, ásirese, Afrıkada bolǵan. Dese de, Avstralıa, Jańa Zelandıa, Ortalyq jáne Ońtústik Azıada, kerisinshe, ana ólimi azaıǵan. Sarapshylar medısınalyq kómektiń sapasyn jaqsartyp, qyz-kelinshekterge otbasyn josparlaýǵa qatysty kómek kórsetýge shaqyryp otyr.