Anasy náresteni tabıǵı jolmen dúnıege ákelgen.
Temirtaýdaǵy "Ana men bala" kópsalaly ortalyǵynda salmaǵy 5055 gram batyr bala dúnıege keldi, dep habarlaıdy Almaty-akshamy.kz Tengrinews.kz saıtyna silteme jasap.
Bosanǵan áıel aýrýhanaǵa 22 aqpanda túsken. Salmaǵy 5055 gram, boıy 57 santımetr ul bala dúnıege kelgen. Áıeldiń bul tórtinshi balasy. Qazirgi ýaqytta anasy men balasy dárigerlerdiń baqylaýyndaǵy "ana men bala" palatasynda. Ekeýiniń de jaǵdaılary qalypty.
"Úlken salmaqty balalardyń týylýy jıi kezdesedi, ıaǵnı bul 4000 gramnan asatyn balalar, olar úlken bolyp sanalady. Al salmaǵy 5000 gramnan asatyn sábıler alyp balalar tobyna jatady. 2022 jyly úlken salmaqpen 54 náreste, alyp salmaqty 10 náreste dúnıege keldi. Onyń ishinde eń úlkeni oblystyq klınıkalyq aýrýhananyń perınataldyq ortalyǵynda dúnıege kelgen, salmaǵy - 6520 gram. 2023 jyldyń aǵymdaǵy kezeńinde úlken salmaqty 4 sábı dúnıege keldi, onyń bireýi Temirtaý qalasynyń kópsalaly ana men bala ortalyǵynda, - delingen habarlamada.