Osyǵan deıin Katar Qazaqstanǵa 50 mln dollar ınvestısıalaǵan.
Vıse-premer - Saýda jáne ıntegrasıa mınıstri Serik Jumanǵarınniń aıtýynsha, búgin Katar men Qazaqstan arasynda eki mańyzdy qujatqa qol qoıylady, dep habarlaıdy Almaty-akshamy.kz
Onyń biri - saýda-ekonomıkalyq yntymaqtastyq týraly negizdemelik kelisim. Ekinshisi - standarttaý men metrologıa salasyndaǵy kelisim.
«Kóbisi túsine bermeıdi, biraq bizdiń taýarlardyń naryqta tanylýy turǵysynan bul - óte mańyzdy kelisimshart. Qoı etin, muzdatylǵan et jetkizý, Qazaqstan aýmaǵynda sút baǵytynda sıyr ósirý boıynsha ýaǵdastylyqqa qol jetkizildi», - dedi Jumanǵarın.
Sonymen qatar, onyń aıtýynsha, qarjy salasynda da úlken jumys atqarylyp jatyr.
«Katardyń belgili banki osy jerde bank ashýdy josparlap otyr. AHQO bırjasynda qazir túrli katarlyq ınstıtýttar tirkelýde», - dedi vıse-premer.
Jumanǵarın Katar osyǵan deıin Qazaqstanǵa 50 mln dollar ınvestısıalaǵanyn atap ótti. Sonyń ishinde qaıyrymdylyq ta bar, Almatyda medısınalyq mekeme saldy.
«Saýda aınalymy 3 mln dollar shamasynda. Bul tómen kórsetkish ekenin moıyndaý kerek. Qazir tetikter men quraldardy jaqsartyp jatyrmyz. Saýda áleýeti 70 mln dollardy quraıdy», -dedi Jumanǵarın.
Katar ámiri sheıh Támım ben Hamad Ál Tánı Astanaǵa memlekettik saparmen keldi. Aqordada saltanatty túrde qarsy alý rásimi ótti.