Jergilikti turǵyndar densaýlyǵy úshin alańdaıdy.
Almaty oblysynyń turǵyndary tereze túbindegi qoqys tastaıtyn orynǵa shaǵymdandy, dep habarlaıdy Almaty-akshamy.kz.
«Astana» telearnasynyń málimetinshe, ol oryn İle aýdanyndaǵy turǵyn úılerdiń qasynda paıda bolǵan. Munda júk kólikteri tonnalap turmystyq qaldyqtar men qurylys materıaldaryn ákelýi saldarynan aýyl mańynda qoqys taý bop úıilip jatyr.
«Olar kúnine birneshe ret keledi. Dál qazir 5 kamaz kelip ketti. Qoqystardy myna shuńqyrǵa tastap jatyr. Qoqysty nege dál osy jerge jınaıdy? Munda adamdar turady emes pe? Tynystaıtyn aýa joq, shań, sasyq ıis», - deıdi zeınetker Gúljahan Qalıeva.
Munda qurylys materıaldarynyń qaldyqtary, qatty turmystyq qaldyqtar tógiledi. Tipti janýarlardyń ólekseleri de bar. Jergilikti turǵyndar densaýlyǵyna alańdaıdy. Qoqys jan-jaqtan jetkizilip jatyr. Tipti Almatydan da ákelinetin kórinedi. Turǵyndardyń aıtýynsha, jergilikti qoqys aýmaǵynda tyshqandar men egeýquıryqtar kóbeıgen.
Aýyl ákimdigi qoqys tastaıtyn aýmaq jekemenshik ıeliginde ekenin habarlady. Sheneýnikter aýmaqty tazartý qajettiligi týraly birneshe ret eskertkenmen, áli jaýap bolmaǵan.
«Ýchaskelik ınspektor 30 AEK kóleminde aıyppul saldy. Qazir bul jerdiń ıesine aýmaqty tolyǵymen tazartý týraly hat joldadyq. Búgin ekologıa departamenti men jer ınspeksıasy departamentine tıisti sharalar qabyldaý týraly hat joldap otyrmyz», - dedi Kazsık aýyldyq okrýginiń ákimi Baýyrjan Jumabaev.