Gıdranttardan aqqan 500 lıtr sý teńizge jaıylyp ketken
Aqtaýdyń órt sóndirýshileri teńizge las sý tókkeni úshin jazaǵa tartyldy. Kináli tulǵalar endi aıyppul tóleıdi, dep habarlaıdy Almaty-akshamy.kz «Habar 24» telearnasyna silteme jasap.
Taıaýda Kaspııge qyzǵylt tústes suıyqtyq tógilgeni kórsetilgen beınejazba ǵalamtorda jarıalanǵan bolatyn. 1-shaǵyn aýdandaǵy jaǵajaı shuǵyl tekserilip, tot aralas ylǵaldyń sol mańdaǵy №13 órt sóndirý bóliminen shyqqany anyqtaldy.
Ekologtardyń aıtýynsha, tesik sısternada saqtalǵan jáne gıdranttardan aqqan 500 lıtr sý teńizge jaıylyp ketken.
«Jedel sholý jumystary júrgizilip, teńiz sýynan synamalar alyndy. Órt sóndirý jasaǵynyń basshysynan túsinikteme alyndy. Kóp ýaqyt saqtalǵan sý tattanyp, sol kúıi teńizge aǵyp ketken. Qyzmettik mindetti adamǵa aıyppul retinde shara qoldanylatyn bolady»,-dedi Ekologıa departamentiniń bólim basshysy Gúlim Ulyqpanova.