Bólingen qarjy qalaı jumsalady?
Bul týraly OSK hatshysy Sabına Mustafına Ortalyq referendým komısıasy aıasynda ótken brıfıńte aıtty.
«Referendýmǵa Úkimettiń rezervtik qarajatynan 16 mlrd 460 mln teńge bólindi. Onyń 21 paıyzy ýchaskelik komısıalardyń materıaldyq-tehnıkalyq bazasyn qamtamasyz etýge, Ortalyq referendým komısıasynyń, referendýmnyń ýchaskelik jáne aýmaqtyq komısıalarynyń jumys jaǵdaıyn qamtamasyz etý, baspa ónimderin shyǵarý, aqparattyq qamtamasyz etý boıynsha jumys, sondaı-aq respýblıka boıynsha aqparattyq bılbordtardy daıyndaý jáne ornalastyrýǵa jumsalady», – dedi Mustafına.
Smetada qarajattyń 79 paıyzy ýchaskelik jáne aýmaqtyq komısıalardyń 71 myńǵa jýyq múshesin eńbekaqymen qamtamasyz etýge jumsalmaq. «Tólem naqty jumys istegen ýaqytyna qaraı tólenedi. Komısıa músheleriniń barlyǵy birdeı jumys istemeıdi. Komısıa músheleriniń kópshiligi is júzinde negizgi kásibı qyzmetinen aýytqymaıdy jáne komısıalarda keste boıynsha jumys isteıdi», – dedi ol.
Daýys qalaı beriledi?
Bul týraly OSK basshysynyń orynbasary Konstantın Petrov túsindirdi.
«Búletender jasyryn daýys berý kabınasynda toltyrylýy tıis. Ony árkim ózi toltyrady. Toltyrý kezinde saılaýshydan basqa bireýdiń bolýyna tyıym salynady. Eger jeke azamattar densaýlyǵyna baılanysty nemese basqa sebeptermen ony óz betinshe toltyra almasa, olar referendýmdy uıymdastyrýshylar men baqylaýshylardyń qyzmetin emes, basqa azamattyń qyzmetin paıdalanýǵa quqyly», – dedi K.Petrov.
Onyń aıtýynsha, azamat ózi daýys beretin jaýaptyń oń jaǵyndaǵy bos jáshikke kez kelgen belgini qoıa alady.
«Bir suraq, eki jaýap. Ony tańdap, bir belgi qoıý kerek, – belgileýge bolady, + qoıýǵa bolady, dóńgeletýge bolady, «galochka» qoıýǵa bolady. Biraq tańdaý anyq bolýy kerek. Qaryndashpen belgi qoıýǵa, sondaı-aq olarǵa qandaı da bir túzetýler engizýge jol berilmeıdi. Toltyrylǵan búleten saılaý jáshigine tastalady», – dedi.
Qatysýdy qalaı tekserýge bolady?
Bul týraly Sıfrlyq damý, ınovasıalar jáne aeroǵarysh ónerkásibi vıse-mınıstri Áset Turysov tarqatty.
Ol referendým ýchaskesiniń shekaralarynda turǵylyqty jeri boıynsha turaqty tirkelgen azamat ózin respýblıkalyq referendýmǵa qatysýǵa quqyǵy bar azamattardyń tiziminen tappaǵan jaǵdaıda, óziniń derbes derekterin paıdalaný týraly kelisimin kórsete otyryp, tizimge engizý týraly jazbasha ótinishpen ýchaskelik komısıaǵa júginýge quqyly ekenin aıtty.
Onlaın-servıs paraǵynda ótinish berýshiniń turǵylyqty jeri boıynsha referendýmnyń tıisti ýchaskesiniń shekarasyndaǵy aýmaqta turaqty tirkelgeni týraly málimetter rastalǵan kezde ýchaskelik komısıa ony respýblıkalyq referendýmǵa qatysýǵa quqyǵy bar azamattardyń tizimine engizý týraly sheshim qabyldaıdy.