Túpqaraǵan túbeginiń jaǵalaýynda 4-5 qarasha kúnderi 121 óli ıtbalyqtyń denesi tabyldy.
Gıdrobıologıa jáne ekologıa ınstıtýtynyń mamany Ásel Baımuqanovanyń aıtýynsha, Mańǵystaý oblysyndaǵy Túpqaraǵan túbeginiń jaǵalaýynan 27 qyrkúıek pen 30 qazan aralyǵynda barlyǵy 305 ıtbalyqtyń óleksesi anyqtalǵan.
Ásel Baımýkanovanyń málimetinshe, on ıtbalyqtyń óleksesinde mehanıkalyq jaraqattar, kesilgen izder, tor men arqanǵa oralý belgileri bolǵan. Bir óleksede basy joq bolǵan.
«Bul jaraqattardyń keıbiri kezdeısoq bolǵanymen, basym bóligi zańsyz aýlaýdyń nátıjesi bolýy múmkin», — dep túsindirdi zertteýshi.
Itbalyqtardyń kópshiliginde zorlyq-zombylyqtan ólgen belgi baıqalmaǵan. Zertteý toby úlgilerdi alyp úlgergenimen, janýarlardyń deneleri qatty shirip ketkendikten, tolyq taldaý jasaý múmkin emes.
«Eń alańdatatyny, zerttelgen analyq ıtbalyqtardyń jartysynan astamy býaz bolǵan, al barlyq ıtbalyqtar semiz edi. Bul olardyń óler aldynda jas ári ómirsheń bolǵanyn kórsetedi. Ólimderi tabıǵı emes, kenetten bolǵan tárizdi», — deıdi Ásel Baımuqanova.
Itbalyqtar Soltústik Kaspııge kóbeıý úshin mıgrasıa jasap jatqan kezde qyrylǵan. Janýarlardyń jappaı qyrylýyna ne sebep bolǵany ázirge belgisiz: bul jer silkinisiniń áseri, tabıǵı gazdyń bólinýi, teńiz sýlarynyń lastanýy nemese epıdemıa bolýy múmkin.
Esterńizge sala ketsek buǵan deıin Túpqaraǵan aýdanynyń Baýtın aýmaǵynda 151 ıtbalyqtyń óleksesi tabylǵanyn jazǵan bolatynbyz.