Kásibin domalatyp, kúni-túni eńbek etken kásipkerler qarajattan qysylyp jatqan joq. Erinbeı kórshi elden túrli taýar tasyp, saýda kórkin qyzdyryp jatqandary qanshama? Endeshe búgingi kórshi Qytaı elimen aradaǵy vızasyz rejımniń tıimdiligi bar ma? Jeke kásipker Erzat Musırattyń pikirin bilgen edik.
- Qytaı men Qazaqstan arasynda vızasyz rejımniń engizilýin óz basym jaqsyǵa jorımyn. Onyń sebebin aıtar bolsam, eń aldymen, biz mynany eskerýimiz kerek. Álemdegi jaǵdaıǵa baılanysty Qytaı taýarynyń Eýropaǵa tasymaldaýyna úlken kedergi bolyp tur. Bul kedergini Qytaı bıligi tek Reseı federasıasyn aınalyp ótip, Qazaqstan terıtorıasy arqyly Kaspıı teńizine shyǵyp, ary qaraı Bakýmen uly qurlyqqa jetý josparlaryn oryndamaqshy. Bul biz úshin tranzıttik áleýetti paıdalanýdaǵy úlken múmkindik. Al taýar tasymalynyń júk kólikteri arqyly iske asatynyn eskersek, shekaradan júk kólikteriniń kedergisiz ótýine júrgizýshilerdiń de vızasyz ótýi qatty yqpal etedi.
(Sýret: ashyq derekkóz)
Al ekinshi sebep, el azamattary kórshi elge vızasyz ótetin bolsa kásip bastamaqshy bolǵan azamattarymyz úshin Qytaı ashyq keńestikke aınalary haq. Qajet kezde álemniń eń iri óndirýshi kásiporyndaryna bara alady. Sonymen qatar Qazaqstanǵa ınvestısıa tartýǵa úlken múmkindik.
Al halyqtyń úreıine keler bolsaq, oǵan esh negiz joq dep oılaımyn. Vızasyz kelgen azamat elde uzaq turýǵa, turý maqsatyn ózgertýge, turaqty tirkeýge turýǵa múlde ruqsat joq. Munyń barlyǵy tek vızamen kelgen jaǵdaıda ǵana bolady. 30 kún merzim aıaqtalǵanda elden shyǵýǵa mindetti. Al eki el arasyndaǵy kelisilgen ýaqyttan asyp ketse, aıyppul men elden qýý syndy aýyr sharalar qarastyrylǵan, - deıdi kásipker.