Kondıter Nurshat Aqbergenova men bloger Áselına Batyr arasyndaǵy "tort daýy" qoǵamda qyzý talqylandy. 600 myń teńgege baǵalanǵan tapsyrys áli tolyq ótelmegen. Aqshamnews.kz redaksıasy mundaı jaǵdaı týyndamaý úshin neni eskerý keregi týraly zańger Gúlzat Mergenáliqyzymen suhbattasty.
Ne bolǵan edi?
Taıaýda áleýmettik jelide kondıter Nurshat Aqbergenova men bloger Áselına Batyr arasyndaǵy daýǵa jurt erekshe nazar aýdardy. Kondıterdiń aıtýynsha, ol 18 keli merekelik tort pisirip, oǵan 440 myń teńge shyǵyndalyp, eńbeginiń aqysy retinde 600 myń teńge suraǵan. Alaıda tapsyrys berýshi tortty alǵan soń, tolyq tólem jasamaǵan.
Nurshattyń sózine sensek, bloger bir apta boıy aqshany tólemeı, keıin áleýmettik jelide ony buǵattap tastaǵan. Al Áselına óz kezeginde 100 myń teńgesin tólegenin, biraq baǵa aldyn ala naqty kelisilmegenin alǵa tartyp otyr.
Eki apta boıy áleýmettik jelide qyzý talqylanǵan tort jyrynyń sál saıabyrsyǵany mine ǵana. Kondıter blogerdi sotqa bergeni belgili bolǵannan keıin daýlasqandar da, túrli pikir jazǵandar da sap tyıyldy.
Zańger ne deıdi?
Bul jaǵdaıǵa baılanysty zańger Gúlzat Mergenáliqyzy mynadaı túsinikteme berdi:
– Mundaı jaǵdaıda mindetti túrde kelisimshart bolýy kerek. Qyzmet túri, baǵasy, qosymsha talaptary bári jazbasha túrde kórsetilýge tıis. Qazirgi tańda kelisimshartty tipti WhatsApp arqyly jasaýǵa bolady. Mysaly: «Men, Pálenshe Túgensheev, osyndaı qyzmet kórsetemin. Baǵasy osynsha. Mynadaı jaǵdaıda qosymsha tólem bolady. Mindetti túrde Kelisesiz be?» dep naqtylap jazý qajet. Tapsyrys berýshi kelisimin jazbasha túrde bergeni jón. Eger mundaı qujat bolmasa, sotta dáleldeý óte qıyn bolady, – deıdi zańger.
Onyń aıtýynsha, kásipker men tutynýshy arasyndaǵy kez kelgen daýda túbirtek, kelisimshart, hat almasý jazbalary negizgi dálel bolyp sanalady.
Kondıter men bloger arasyndaǵy túsinispeýshilikke qatysty zańger tortty ázirleý barysynda ózgerister bolyp, onyń barysy tapsyrys berýshige eskertilmeı qalǵan bolýy múmkin degen boljamdy usyndy.
«Tortty daıyndaǵan kásipkerdiń osynsha shyǵyn shyǵarǵanyna qaraǵanda, múmkin tapsyrys berýshi bastapqyda onyń pishinin domalaq qylyp jasaımyn dep alyp, keıinnen pishinen júrek tárizdes etip jasańyz degendeı qalaýyn ózgertken bolar. Bul jaı ǵana mysal. Tapsyrys ózgergen saıyn, onyń tólemi de ózgeretinin eskertilmeı qaldy ma eken?», - deıdi ol.
Daýlardy sheshýdiń zańdy joldary
1. Sotaldy tártip
• Kelissóz júrgizý – taraptar ózara sóılesip, máseleni beıbit jolmen sheshýge tyrysady.
• Jazbasha talap qoıý – tutynýshy kásipkerge resmı hat jazyp, aqshasyn qaıtarýdy nemese kemshilikti túzetýdi talap etedi.
• Medıasıa – arnaıy medıator kómegimen eki jaqty bitimge kelý. Medıasıa arqyly jasalǵan kelisim sot sheshimimen teń.
• Tutynýshylar quqyǵyn qorǵaý organdaryna shaǵym – Saýda jáne ıntegrasıa mınıstrliginiń komıteti, jergilikti basqarmalar, «Atameken» palatasy nemese qoǵamdyq birlestikterge júginý.
• Ákimshilik shaǵym – eger kásipker zań buzsa, ýákiletti organǵa aryz túsirip, aıyppul saldyrýǵa bolady.
2. Sot arqyly sheshý
• Azamattyq sotqa talap-aryz berip, aqshany qaıtarý nemese shyǵyndy óndirip alý.
• Sot sheshimi oryndalmaǵan jaǵdaıda sot oryndaýshysy iske kirisedi.
• Eger kásipker qasaqana aldap aqsha alsa, QR QK-niń 190-baby («Alaıaqtyq») boıynsha qylmystyq is qozǵalýy múmkin.
Sabaq bolar jaǵdaı
Zańgerdiń sózinshe, mundaı daý eki tarapqa da sabaq bolýǵa tıis. Kásipker jumysty bastamas buryn naqty kelisim jasasýy, al tutynýshy óz quqyqtaryn saqtap, barlyq shyǵyn men baǵany aldyn ala kelisip alýy qajet. Áıtpese, keıin daý týǵan jaǵdaıda eshqaısysy óz sózin dáleldeı almaıdy.
Tutynýshy men kásipker arasynda kelisimshart jasaý úshin naqty bir soma belgilengen be?
QR zańnamasynda Azamattyq kodekstiń 152-babynyń jalpy bóliminde kelisimshartqa baılanysty túsindirme jazylǵan. Onda kelisimshart jazbasha túrde, aýyzsha jáne notarıaldy túrde bolýy múmkin ekendigi kórsetilgen.
"Eger kelisimshartta kórsetilgen soma 100 AEK-ten assa, onda ol bir aılyq eseptik kórsetkishpen esepteledi.
2025 jyly 1 AEK - 3692 teńge
Al 100 AEK - 369 200 teńge bolyp belgilendi.Demek, 369 200 teńgeden assa nemese osy somanyń jobasynda mindetti túrde jazbasha kelisimshart jasalýy kerek. Bul bizdiń zańda osylaı naqty kórsetilgen", - deıdi zańger.
Gúlzat Mergenáliqyzy osy jerde "Sonda eger kásipker men tutynýshy arasynda kelisilgen soma 369 200 teńgege jetpese, kelisimshart jasamasa bolady" degen oı týyndaýy múmkin ekenin eskerte otyryp:
"Kelisimshartty zań negizinde kez kelgen ýaqytta jazbasha túrde jasaýǵa bolady. Tipti 50 myń teńge somasyna da", - dep tolyqtyrdy sózin.