1940 jyly negizi qalanǵan «ALMATY POLYTECHNIC COLLEGE» uzaq jyldan beri IT-salasy úshin joǵary bilikti kadrlar daıarlaýǵa mamandanǵan jetekshi bilim berý mekemeleriniń biri.
Kolejde «Esepteý tehnıkasy jáne aqparattyq jeliler», «Aqparattyq qaýipsizdik júıeleri», «Baǵdarlamalyq qamtamasyz etý», «Radıotehnıka, elektronıka jáne telekomýnıkasıalar», «Mashınalar men jabdyqtardy paıdalaný jáne tehnıkalyq qyzmet kórsetý» mamandyqtary boıynsha sapaly bilim berý júzege asyrylyp keledi. Kolej 2017 jyldan bastap jumysshy mamandyqtar daıarlaıdy, al 2019 jyldan dýaldy oqytý júıesi engizildi. Oqý ornynda el ekonomıkasynyń qajettilikterine saı kásibı kadrlar daıarlaý jolǵa qoıylǵan.
Búgingi tańda kolejde 1600-den astam stýdent oqıdy, onyń 246-sy jumysshy mamandyqtary boıynsha bilim alsa, al 220-sy dýaldy júıe boıynsha bilim alady. Kolej uzaq jyldar boıy turaqty seriktestikter negizinde qalyptasyp, kásiporyndarmen tyǵyz baılanys ornatylǵan. Onyń bir mysaly –dýaldy oqytý aıasynda óndiristik tájirıbeden ótýge 98 kompanıamen úshjaqty 467 kelisim-shart jasaldy. Oqý josparyna sáıkes stýdentter jyl saıyn kásibı praktıkadan ótip, teorıalyq bilimderin is júzinde qoldaný múmkindigine ıe bolady.
Kolej jumys berýshilermen belsendi yntymaqtastyq, birqatar kompanıalarmen tyǵyz qarym-qatynas ornatqan.
Máselen, qazirgi ýaqytta stýdentter AO «Qazaqtelekom» kompanıasynyń ınternet sapasyn jaqsartýǵa baǵyttalǵan «SAPA+» jobasy boıynsha belsendi jumys júrgizip jatyr. Joba aıasynda qoldanýshylarǵa zamanaýı kúsheıtkishter tegin usynylyp, 5G ınternet jelisine qosylý múmkindigi jasaldy. Stýdentter nátıjeli jumystarynyń arqasynda jalaqy alyp, eń bastysy eńbek jolynda úlken tájirıbe jınaqtap jatyr. Sonymen qatar, elektrondyq qurylǵylardy jóndeý jáne qyzmet kórsetý salasyndaǵy, drondardy satý, operatorlardy oqytý jáne jóndeý jumystarymen aınalysatyn, baspa isimen shuǵyldanatyn birqatar uıymdarda tájirıbeden ótip jatyr.
Kásiporyndardyń qajettilikterin eskere otyryp, maqsatty daıyndaý sheńberinde 65 stýdent bilim alýda. Kadrlardy daıarlaýǵa birqatar iri kásiporyndar qoldaý kórsetedi.
Taqyrypqa oraı
Medet OMARBEKOV,
«Almaty polytechnic college» dırektory:
Maqsat – mamandardyń jańa býynyn daıarlaý
Kolejdiń jyldar boıy qalyptasqan jumys isteý tásilderi men tájirıbeleri bar. Oqý aıaqtalǵannan keıin stýdentterdi jumysqa ornalastyrý boıynsha júıeli jumys júrgiziledi. Bul proses joǵary oqý oryndarymen jáne kásiporyndarmen tyǵyz baılanys ornatýdy talap etedi. Sonymen qatar, bizdiń mekeme túlekterdi jumysqa ornalastyrý úshin túrli mamandandyrylǵan jármeńkeler men kezdesýler uıymdastyryp otyrady. Bul da stýdentterdiń kásibı salada jolyn tabýyna úlken kómegin tıgizedi. Túlekterimizdiń 90%-dan astamy oqý aıaqtalǵannan keıin óz mamandyqtary boıynsha jumysqa ornalasady.
Kolejde «Aqparattyq-kommýnıkasıalyq tehnologıalar» baǵyty boıynsha quzyrettilik ortalyǵy jáne IT-hab Arena jumys isteıdi. Quzyrettilik ortalyǵy stýdentterdi bedeldi chempıonattarǵa, sonyń ishinde ulttyq jáne halyqaralyq WorldSkills chempıonatyna qatysýǵa daıyndaýdyń mańyzdy alańy bolyp tabylady. IT-hab Arena jańa ıdeıalardy izdeýge, shyǵarmashylyq sheshimderdi ázirleýge jáne olardy naqty ómirde sátti júzege asyrýǵa arnalǵan keńistikke aınalyp otyr.
Bizdiń maqsatymyz – jańa býyn mamandaryn daıarlap, olardyń el ekonomıkasynyń damýyna eleýli úles qosýyna jaǵdaı jasaý.