Aýyl sharýashylyǵy mınıstrligi oblys ákimdikterimen birlesip aldaǵy egis naýqanyna qyzý daıyndalýda.
Bıyl aýyl sharýashylyǵy jalpy ónimin eki esege arttyrý maqsatyndaǵy Jol kartasyna saı, egis alqaptaryn ártaraptandyrý jalǵasady. Bul týraly Úkimet otyrysynda Aýyl sharýashylyǵy mınıstri Aıdarbek Saparov málimdedi, dep habarlaıdy aqshamnews.kz.
«Aýyl sharýashylyǵy daqyldary 23,8 mln gektar jerge ornalastyrylady, bul ótken jylmen salystyrǵanda 518 myń gektarǵa artyq. Ártaraptandyrý baǵdarlamasy shamamen 1 mln gektardy qamtıdy, sonyń ishinde joǵary rentabeldi daqyldardyń alqaby 750 myń gektarǵa ulǵaıtylady. Atap aıtqanda, maıly daqyldar 365 myń gektarǵa, jem-shóp daqyldary 184 myń gektarǵa, arpa 114 myń gektarǵa, qaraqumyq 41,5 myń gektarǵa, kartop 15 myń gektarǵa kóbeıtiledi», – dedi mınıstr.
Turaqty jem-shóp bazasyn qamtamasyz etý maqsatynda jem-shóp daqyldarynyń alqabyn 3,4 mln gektarǵa deıin jetkizý josparlanýda. Maıly daqyldardyń kólemi 3,3 mln gektarǵa deıin ulǵaıtylady. Josparlanǵan alqaptar ishki naryqtyń qajettiligin tolyq qamtamasyz etýge múmkindik beredi.