QR Prezıdenti Qasym-Jomart Kemeluly Toqaev «Ádiletti Qazaqstan: zań men tártip, ekono-mıkalyq ósim, qoǵamdyq optımızm» atty Joldaýynda 2025 jyldy «Jumysshy mamandyqtary jyly» dep jarıalaǵany belgili. Memleket basshysy jumysshy mamandyqtaryn dáripteý arqyly qoǵamda eńbekqor jáne naǵyz maman bolý ıdeıasyn nasıhattaý kerektigin atap kórsetken bolatyn.
Qoǵamdaǵy eńbekqorlyq, kásibılik sıaqty qasıetter joǵary baǵalanýǵa tıis. Búgingi tańda elimizdegi 770-ten astam kolejde túrli jumysshy kadrlar daıarlanyp jatyr. Bul bastama qarapaıym eńbek adamdaryna kórsetilgen úlken qoldaý men qamqorlyq dep bilemin.
Almaty tehnologıa-ekonomıkalyq koleji («ATEK» JSHS) jeńil ónerkásip, bıznes jáne qyzmet kórsetý salasynda suranysqa ıe «Tigin óndirisi jáne kıimderdi úlgileý» («tiginshi» biliktiligi), «Tamaqtandyrýdy uıymdastyrý» («kondıter-bezendirýshi» jáne «aspaz» biliktiligi), «Qonaqúı bıznesi» («ákimshi» biliktiligi), «Nan pisirý, makaron jáne kondıter óndirisi» («naýbaıshy» biliktiligi) mamandyqtary boıynsha jumysshy kadrlardy daıarlap keledi. Búginde kolejde 2000-nan astam jas bilim alýda. Onyń 700-ge jýyǵy – bolashaq bilikti jumysshy kadrlar. Oqý orny zaman talabyna saı oqý kabınetterimen, zerthanalarmen, tehnıkalyq oqý quraldarymen jabdyqtalǵan. Bul talapkerler men bilim alýshylardyń atalǵan mamandyqtarǵa degen qyzyǵýshylyǵyn arttyrary sózsiz.
«ATEK» «dýaldy oqytý» boıynsha memlekettik tapsyrys sheńberinde bilikti jumysshy kadrlardy kásiporyndarǵa daıarlaý júıesin iske asyrýda. Kolejimiz jumys berýshiler men jumysshy kadrlardy baılanystyratyn dáneker retinde túrli óndiris oryndarymen ónimdi jumys istep keledi. Sonymen qatar, ATEK bilim alýshylary jas mamandardyń negizgi daǵdylaryn qalyptastyryp, bilimin jetildirý maqsatynda uıymdastyrylatyn WorldSkills chempıonattaryna jyl saıyn dástúrli túrde qatysyp, júldeli oryndarǵa ıe bolyp júr.
Bolashaq jumysshy kadrlar neni bilip, qandaı daǵdylardy meńgerýi kerek? Halyqaralyq standarttar boıynsha mamandar jumys berýshi talaptaryna saı bolýy qajet. Kolejder tarapynan jyl saıyn qanshama maman naryqqa shyǵýda, biraq barlyǵy birdeı jumys taýyp ketedi degen sóz emes. Ol úshin kásibılik te talap etiledi. Almaty tehnologıa-ekonomıkalyq kolejiniń basty maqsaty – jumysshy kadrlarymyzdyń eńbek naryǵynda suranysqa ıe bolýyna yqpal etý. Osyǵan sáıkes, kadr daıarlaý máselesinde oqý baǵdarlamasy óndiris qyzmetkerlerimen birigip daıyndalady. Bul óz kezeginde ónimdi eńbek nátıjesin berýde.
Adal ári tabandy eńbegimen tabysqa jetken adamdar qashanda syı-qurmetke ıe. Prezıdentimiz tujyrymdaǵandaı, eń bastysy, «árkim jaýapkershilikti tereń sezinip, óz mindetin sapaly atqarýǵa tıis». Demek, qandaı da bir salany ıgerý úshin adamǵa eńbek etý kerek. Sonda ǵana elimiz damýdyń dańǵyl jolyna túspek. Jumysshy qadrlardy qoldaý maqsatynda alda talaı ıgi bastamalardyń júzege asatynyna senimimiz mol. Sebebi, óz kásibin jetik meńgergen mamandar ult sapasyn arttyrary haq.