Sanaýly kúnderden keıin Ońtústik Koreıada alaýy tutanatyn qysqy Jasóspirimder Olımpıadasynyń ashylý saltanatynda elimizdiń Kók Týyn ustap shyǵatyn sportshylar belgili boldy. «Memleketter sherýi» kezinde Qazaqstannyń baıraǵyn petropavldyq kónkımen júgirý sportynyń ókili Krıstına Shýmekova men oraldyq short-trekshi Erasyl Shyńǵysqan ustap shyǵady. Atalǵan sportshylar jarystardaǵy joǵary jetistikteri úshin ǵana emes, sonymen qatar halyqaralyq arenadaǵy jeńiske degen jigeri úshin tańdaldy. On segiz jasar Krıstına Shýmakova kónkımen júgirý sportynan QR sport sheberi, óziniń jas sanatyndaǵy Qazaqstan Respýblıkasynyń chempıony, 2023 jylǵy Álem Kýbogynyń ıtalándyq kezeńiniń kúmis júldegeri. On jeti jasar Erasyl Shyńǵysqan short-trekten sport sheberine kandıdat, óziniń jas sanatyndaǵy Qazaqstan Respýblıkasynyń chempıony, sondaı-aq «Azıa balalary» 2023 halyqaralyq jarysynyń kúmis júldegeri.
«Bul – men úshin óte áserli sát. Jasóspirimderdiń qysqy Olımpıadasynda Qazaqstandy tanystyrý – abyroıly mindet qana emes, úlken jaýapkershilik. Men jarys jolynda bar kúsh-jigerimdi salýǵa ýáde beremin. Tórt jyldyqtyń basty dodasyna qatysatyn árqaısymyz Olımpıada medalin jeńip alǵymyz keledi jáne bul Oıyndar bizdiń osy maqsatqa jetý jolyndaǵy tamasha múmkindigimiz», - dep óz áserimen bólisti Krıstına Shýmekova.
Short-trekten Qazaqstan quramasynyń múshesi Erasyl Shyńǵysqan da óz oıyn ortaǵa saldy: «Men úshin Tý ustaýshy bolý – úlken jaýapkershilik. Bizdiń ulttyq qurama sportshylary aldaǵy baıraqty básekege daıyn jáne biz Ońtústik Koreıadaǵy jarysta el namysyn abyroımen qorǵaıtynymyzǵa senimdimin. Jasóspirimder Olımpıadasyna qatysý – árqaısymyz úshin zor tájirıbe, kásibı sportshy retinde ósýimizge mol múmkindik».
Olımpıada oıyndaryna daıyndyq boıynsha shtab basshysy Elsıar Qanaǵatov tý ustaýshylardyń durys tańdalǵanyna senimdi ekenin jetkizdi: «Krıstına men Erasyl – bizdiń myqty ári uıymshyl komandamyzdyń jarqyn ókilderi. Olardyń kásibıligi, ynta-jigeri men sportqa degen adaldyǵy Ońtústik Koreıaǵa baratyn jasóspirimder quramasy músheleriniń boıynan eń jaqsy qasıetteri dáleldep tur. Atalǵan sportshylar – el sportynyń jańa býyny, biz olardyń qysqy Jasóspirimder Olımpıadasynda óner kórsetýin asyǵa kútemiz. Sonymen qatar jas sportshylar Oıyndarǵa qatysý arqyly tek tájirıbe jınap qana qoımaı, óz sheberlikterin shyńdaý jolynda qundy sabaq alady dep úmittenemiz».
Aıta keteıik, Kanvon-2024 IV qysqy Jasóspirimder Olımpıadasy 19 qańtardadan 1 aqpanǵa deıin Ońtústik Koreıanyń Kanvon provınsıasynda ótedi. Azıa qurlyǵynda alǵash ret uıymdastyrylyp jatqan Jasóspirimderdiń qysqy Olımpıadasyna álemniń 50 elinen 1800 sportshy qatysady dep josparlanǵan. 7 sport túrinen (15 baǵdarlama) 81 medal jıyntyǵy sarapqa salynady. Qazaqstan quramasynyń 42 sportshysy 5 sport túri boıynsha baq synaıdy.