XVII Halyqaralyq «Eýrazıa» kınofestıvaliniń basty qonaǵy Nýrı Bılge Djeılan bolady. Bul týraly búgin Almaty qalasynyń Óńirlik komýnıkasıalar qyzmetinde ótken baspasóz konferensıasynda málim boldy, dep habarlaıdy aqshamnews.kz.
Túrkıanyń ataqty rejıseri Djeılan Kann kınofestıvalinde birneshe ret joǵary marapattarǵa ıe bolǵan. Onyń «Qysqy uıqy» atty fılmi 2014 jyly festıváldiń eń joǵary júldesi – «Altyn pálma butaǵy» júldesin jeńip aldy. Budan bólek, onyń «Birde Anatolıada» fılmderi qazylar alqasynyń bas júldesin ıelense, 2008 jyly «Úsh maımyl» týyndysy úshin «Úzdik rejıser» ataǵyn aldy.
«Nýrı Bılge Djeılan – álemdik kınematografıanyń moıyndalǵan sheberi, Túrkıanyń bedeldi rejıserleriniń biri. Onyń týyndylary álemniń eń iri kınofestıvalderin baǵyndyrdy. 2024 jyly Djeılan «Eýrazıa» kınofestıvaliniń halyqaralyq baıqaýynyń qazylar alqasyna tóraǵalyq etedi», – dep atap ótti Dıana Áshimova.
Sonymen qatar, Nýrı Bılge Djeılannyń shyǵarmalary basqa da bedeldi kınofestıvalderde joǵary baǵalandy. Onyń 2000 jyly túsirilgen «Mamyr bulttary» fılmi Eýropalyq kıno akademıanyń FIPRESSI syılyǵyna ıe boldy. Djeılannyń jalpy sany 97 halyqaralyq marapaty bar.
Nýrı Bılge Djeılan 1959 jyly 26 qańtarda Ystambulda dúnıege kelgen. Ony kóbinese tereń mazmundy, poetıkalyq ári ıntellektýaldyq týyndylarmen baılanystyrady. Rejıser óziniń erekshe stılimen tanymal. Onyń fılmderinde kórkemdik estetıka men fılosofıalyq tolǵanystar úılesim tapqan. Shyǵarmalardyń basym bóligi ýaqyt, jalǵyzdyq, estelik pen adam tabıǵaty týraly syr shertedi.
«Eýrazıa» kınofestıvaliniń halyqaralyq baıqaýynyń qazylar alqasynyń tóraǵasy retinde Nýrı Bılge Djeılan Shyǵys pen Batys mádenıetin toǵystyryp, kınematografıaǵa óz kózqarasyn usynady.
Dástúrli festıváldiń negizin qalaýshy jáne uıymdastyrýshy – QR Mádenıet jáne aqparat mınıstrligi. Kınofestıvaldi tikeleı uıymdastyrý Sháken Aımanov atyndaǵy «Qazaqfılm» ulttyq kınostýdıasyna júktelgen.