Qazaq ulttyq qyzdar pedagogıkalyq ýnıversıtetinde belgili ǵalym-lıngvıst, fılologıa ǵylymdarynyń doktory, profesor Valentına Ivanovna Jumaǵulovanyń 70 jyldyq mereıtoıy atalyp ótti, dep habarlaıdy aqshamnews.kz.
Qazaqstan jýrnalıser odaǵy syılyǵynyń laýreaty, Qazaqstannyń eńbek sińirgen qaıratkerine arnalǵan «Byt pedagogom ı ýchenym – ıskýsstvo otdavat» atty saltanatty jıynǵa belgili memlekettik qaıratkerler, ǵalymdar men akademıalyq qaýym ókilderi qatysty.
«Valentına Ivanovna Jumaǵulovamen ǵylymı jumys baby boıynsha jıi kezdesemiz. Sonymen qatar biz – otbasylyq dostarmyz. Ol kisi óte jarqyn tulǵa. Bir ǵalym degen – bir memleket. Osyndaı júz ǵalym bolsa, júz memlekettiń máselesi sheshiledi. Valentına Ivanovany búgingi 70 jyldyq mereıtoıymen quttyqtaı otyryp, bıik belesterdi baǵyndyra berýin tileımin», – dedi Qazaqstan ınovasıalyq jáne telekomýnıkasıalyq júıeler ýnıversıtetiniń Prezıdenti, Qazaqstan Respýblıkasy Ulttyq ınjenerlik Akademıasynyń akademıgi Aqserik Áıtimov.
Qazaq ulttyq qyzdar pedagogıkalyq ýnıversıtetiniń Basqarma Tóraǵasy – Rektory Gúlmıra Qanaı Valentına Ivanovnany 70 jyldyq mereıtoıymen quttyqtaı otyryp, ýnıversıtettiń damýyna qosqan úlesi úshin medal tabys etti.
Saltanatty jıynda Qorqyt Ata atyndaǵy Qyzylorda ýnıversıtetiniń Basqarma Tóraǵasy – Rektory, fılologıa ǵylymdarynyń kandıdaty, Valentına Jumaǵulovanyń shákirti Beıbitkúl Kárimova ustazyna alǵys aıtyp, ystyq lebizin jetkizdi.
«Ustazymnyń ómirimde alar orny erekshe. Valentına Ivanovna meniń ata-anamnan keıingi eń jaqyn adamym desem, artyq aıtqanym emes. Sebebi maǵan ómirlik jol kórsetip, tulǵa bolyp qalyptasýyma óz septigin tıgizdi. Óte sabyrly, adamgershiligi mol, bilimdi, sypaıy jan. Osy qasıetteri – barshamyzǵa úlgi. Qazaqtyń kelini qandaı bolý kerek dese, Valentına Jumaǵulovany kórseter edim. Maǵan bergen bilimi men tárbıesi úshin ustazyma aıtar alǵysym sheksiz», – dedi Beıbitkúl Sársemhanqyzy.
Saltanatty shara aıasynda profesor Valentına Ivanovnanyń ǵylymı jumystarynyń kórmesi usynylady. Onda ǵalymnyń oqý tájirıbesinde qoldanylyp, bolashaq muǵalimderdi jańa bilimmen baıytatyn ǵylymı-zertteý ıdeıalary baıandalǵan. Sondaı-aq ǵalymnyń ǵylymı-pedagogıkalyq qyzmetine arnalǵan kitaptyń tusaýkeseri ótti. Kitaptyń lentasyn Qazaqstan Respýblıkasy Parlamenti Senaty janyndaǵy Senatorlar keńesi Tóraǵasynyń orynbasary Birǵanym Áıtimova, Joǵary oqý oryndary qaýymdastyǵynyń Prezıdenti, akademık Alshanov Rahman Alshanuly, fılologıa ǵylymdarynyń doktory, profesor, Qazaqstan Jazýshylar odaǵynyń múshesi Ýálıhan Qalıjanov, Qazaqstan Respýblıkasy Parlamenti Senaty janyndaǵy Senatorlar keńesiniń múshesi Dınar Nóketaeva qıdy.
Qazaqstannyń eńbek sińirgen qaıratkeri, belgili ǵalym-lıngvıst, fılologıa ǵylymdarynyń doktory, profesor Valentına Ivanovna jıyn sońynda ustazdyq mamandyqtyń mańyzdylyǵy týraly aıtyp, kelgen qonaqtarǵa óziniń sheksiz alǵysyn aıtty.
«Ustaz bolý – eń jaýapkershiligi mol mamandyq. Shákirtterimizge durys tálim-tárbıe berý – bizdiń basty mindetimiz. Bilimdi eldiń bolashaǵy qashan da jarqyn. Elimizdiń órkendeýine óz úlesin qosar Ýnıversıtetimizdiń bilimdi de bilikti túlekteri bıikterden kórine bersin. Búgin jıynǵa kelgen barsha qonaqtarǵa aıtar alǵysym sheksiz», – dedi Valentına Ivanovna.
Ustazdyń bilim salasyna qosqan qyzmetin baǵalap, jas pedagogtarǵa úlgi retinde kórsetý úshin ótken saltanatty jıyn konserttik baǵdarlamaǵa ulasty.