Murajaılarda taqyryptyq ekskýrsıalar ótkiziledi.
Mádenıet jáne aqparat mınıstrliginiń bastamasymen kúzgi kanıkýl kezinde mektep oqýshylaryna birqatar tegin is-sharalar uıymdastyrylady, dep habarlaıdy aqshamnews.kz
Ulttyq mýzeıde mektep demalysy kezinde tarıhı-mádenı murany nasıhattaý maqsatynda taqyryptyq tegin ekskýrsıalar ótkiziledi. Ekskýrsıa barysynda oqýshylar brıtandyq músinshi Iýnýs Safardıardyń týyndylary men otandyq sýretshi Tileýjan Batanovtyń jeke kórmelerin tamashalaı alady.
Ábilhan Qasteev atyndaǵy Memlekettik óner mýzeıinde «Altyn kúz» taqyrybynda plener, tumar jasaý boıynsha sheberlik sabaqtary josparlanǵan.
Memlekettik ortalyq mýzeı balalar úshin «Qazaq handyǵynyń bıleýshileri» jobasy aıasynda sıkldik sabaqtar, «Abylaı han» jáne «Qazaq halyq fólklory: qazaq ertegileri áleminde» jobasy aıasynda teatrlandyrylǵan «Aldar Kóse – meniń súıikti keıipkerim» mýzeılik sabaqtaryn uıymdastyrady.
Jambyl atyndaǵy Qazaq memlekettik akademıalyq fılarmonıada «Oqýshylarǵa arnalǵan abonoment» jobasy boıynsha ár konsertke kirý úshin múmkindigi shekteýli balalarǵa arnaıy 10 oryn tegin qarastyrylǵan.
Abaıdyń «Jıdebaı-Bórili» memlekettik mýzeı-qoryǵy «Kúzgi demalys mýzeı aıasynda» atty aptalyq ótkizip, oqýshylar arasynda vıktorınalar, «Tańbaly» mýzeı-qoryǵy oqýshylar úshin qyzyqty kvest-oıyn ótkizýdi josparlap otyr.
«Áziret Sultan» memlekettik tarıhı-mádenı mýzeı-qoryǵynda osy jyldyń qyrkúıeginen bastap arnaıy mektep oqýshylary úshin «Iasaýıtaný» klýby men «Jas arheolog», «Jas restavrator», «Jas ekskýrsovod» úıirmeleri turaqty túrde tegin jumys jasap keledi.
Mýzeı pedagogıkasy jobasy boıynsha «Botaı» mýzeı-qoryǵynda balalar úshin tegin kórmeler men ekskýrsıalar uıymdastyrylyp, ashyq esik kúnderi ótkiziledi. Sondaı-aq, ekskýrsıa barysynda «Botaı mádenıetiniń arheologıalyq zertteýleri» ınstallásıasy usynylady.
«Ejelgi Taraz eskertkishteri» memlekettik tarıhı-mádenı mýzeı-qoryǵyna qarasty «Qarahan», «Dáýitbek», «Aısha bıbi», «Babadja hatýn» keseneleri, «Aqyrtas» sáýlet-arheologıalyq kesheni men «Kóne Taraz» ashyq aspan astyndaǵy arheologıalyq saıabaǵyna balalarǵa jyl boıyna aqysyz kirý qarastyrylǵan.
2017 jyldan bastap ár aıdyń sońǵy jeksenbisinde jáne kanıkýl kúnderi mektep oqýshylary úshin «Esik» memlekettik tarıhı-mádenı mýzeı-qoryǵyna tegin kire alady. Sonymen qatar, Esik jáne Almaty qalalaryndaǵy múgedek jáne kórý qabileti nashar balalarǵa mýzeı-qoryqqa aqysyz kirý qarastyrylǵan.
«Saraıshyq» memlekettik tarıhı-mádenı mýzeı-qoryǵy mektep oqýshylaryna arnaıy ekskýrsıa uıymdastyryp, «Kúz qyzyqtary» sheberlik saǵatyn ótkizedi.
«Otyrar» memlekettik arheologıalyq mýzeı-qoryǵy Arystanbab kesenesi, Otyrar-tóbe jáne Sapar ortalyǵy ǵımarattaryna ekskýrsıalardy tegin uıymdastyrady.
«Ulytaý ulttyq tarıhı-mádenı jáne tabıǵı mýzeı-qoryǵy» mektep oqýshylaryna arnap «Joshy ulysy: tarıhy jáne murasy» taqyrybynda tegin kórme uıymdastyrady. Kórmede Ulytaý óńirinde ornalasqan Altyn Orda dáýirine jatatyn tarıh jáne mádenıet eskertkishteri tanystyrylady.