Qazaqstan Respýblıkasy Prezıdenttigine kandıdat Saltanat Tursynbekova Qazaqstandaǵy ana men bala ólimi taqyrybyna arnalǵan jıyn ótkizdi.
Jıyn Atyraý qalasynda uıymdastyryldy, dep habarlaıdy Almaty-akshamy.kz.
«Ana men bala óliminiń deńgeıi – el medısınasynyń damýyn sıpattaıtyn mańyzdy kórsetkishterdiń biri. Bul kórsetkishter memlekettegi ómir súrý deńgeıi týraly da aıtady, sodan keıin ol halyqaralyq reıtıńterde de kórsetiledi. Qazaqstanda bul kórsetkishter burynnan ósip kele jatqanymen, sońǵy ýaqytta asqan jyldamdyqpen óse bastady. Biz árbir áıel men sábı úshin kúresýimiz kerek», - dedi Tursynbekova.
Kandıdat ranking.kz derekterine silteme jasaı otyryp, birneshe sıfrlardy alǵa tartty.
Ulttyq josparǵa sáıkes, ana ólimi 2021 jyly 100 myń tiri týǵanǵa shaqqanda 35-ten tómen bolyp, 2025 jylǵa qaraı 10-ǵa deıin tómendeýi kerek. Al, is júzinde 2021 jyly bul kórsetkish 44,7 boldy. Atyraý oblysynda ana óliminiń naqty kórsetkishi kútilgennen úsh esege joǵary boldy.
«Sońǵy ýaqytta balalar ólimi boıynsha nátıjeler de kóńil kónshitpeıdi. Jyl sońyna deıin Qazaqstanda náreste ólimi 1000 tiri týǵanǵa shaqqanda 7,6-ǵa deıin tómendeýi kerek edi. Alaıda, kórsetkish kerisinshe respýblıka boıynsha orta eseppen 8,44-ke deıin ósti», - dedi spıker.
Náreste óliminiń jıi kezdesetin sebepteri perınataldyq kezeńde týyndaıtyn jaǵdaılar (932 náreste), týa bitken aýytqýlar jıi kezdesedi (335 náreste), sondaı-aq ınfeksıalyq jáne parazıttik aýrýlardyń da áseri bolady (72 náreste).
«Ana men bala óliminiń aldyn alýǵa basa nazar aýdarylýda. Ol úshin qoǵamdyq uıymdarmen, ǵalymdarmen, sarapshylarmen jańa sheshimderdi talqylaý mańyzdy. Shalǵaı eldi mekenderde eńbek etetin áıelder úshin qolaıly jaǵdaı jasaıtyn tıimdi ınfraqurylymdy qurý qajet. Feldsherlik-akýsherlik pýnkter men dárigerlik ambýlatorıalardaǵy medısınalyq kadrlardyń tapshylyǵy máselesin sheshý, osy salalardaǵy medısınalyq joǵary oqý oryndarynan mamandardy kóptep shyǵarý – búgingi kúnniń talaby. Mundaı profıldegi dárigerlerdi jaqsy yntalandyryp otyrý kerek», - dep atap ótti quqyq qorǵaýshy.