ASHM men AMANAT partıasy kóktemgi egis naýqanyn talqylady.
Aýyl sharýashylyǵy vıse-mınıstri Azat Sultanov AMANAT partıasy janyndaǵy Agrarlyq sektor máseleleri jónindegi respýblıkalyq keńes pen AMANAT partıasynyń partıalyq baqylaý komıtetiniń birlesken otyrysynda sóz sóıledi.
ASHM basshysynyń orynbasary aǵymdaǵy jyly kóktemgi egis jumystaryn júrgizý basymdyqqa ıe bolatynyn atap ótti. Osyny eskere otyryp, birinshi kezekte mınıstrlik oblys ákimdikterimen birlesip egis alqaptarynyń boljamdy qurylymyn qalyptastyrǵanyn jetkizdi. Jalpy egis alqaby 24,1 mln gektardy quraıdy, bul 2023 jylǵy deńgeıden 5,2 myń gektarǵa artyq, dep habarlaıdy Almaty-akshamy.kz Aýyl sharýashylyǵy mınıstrligine silteme jasap.
ASHM, sondaı-aq, jemshóp daqyldarynyń alańyn 62,5 myń gektarǵa (3 200 myń ga) ulǵaıtýdy josparlap otyr.
2024 jyldyń ónimine 2,4 mln tonna tuqym qajet, onyń 92% -y 15 qańtarǵa deıin sebildi. Fermerler 2,2 mln tonna kóleminde tuqym qoryn qurdy: saraptamaǵa 1,4 mln tonna jazdyq daqyldar tuqymy tústi. Tekserilgen tuqym kóleminiń 79,1% kondısıaly dep tanyldy jáne egis standartynyń 1 jáne 2 synyptaryna sáıkes keledi. Jalpy tuqym sharýashylyǵyn damytýdy sýbsıdıalaýǵa 12,8 mlrd teńge qarastyrylǵan.
Sonymen qatar, 2024 jyly shamamen 718,8 myń tonna tyńaıtqysh engizý josparlanyp otyr, onyń shamamen 400 myń tonnasy (56%) amıak selıtrasy jáne amofos sekildi otandyq tyńaıtqyshtarǵa tıesili. Mıneraldy tyńaıtqyshtardy sýbsıdıalaý baǵdarlamasyna jergilikti búdjetterde 32,5 mlrd. teńge, pestısıdterdi sýbsıdıalaýǵa 33,7 mlrd. teńge baǵyttalǵan.
Aýyl sharýashylyǵy qurylymdarynda egis naýqanyn júrgizý úshin 149,8 myń traktor, 4,9 myńnan astam ónimdiligi joǵary egis kesheni, 76 myń sepkish, 219 myń topyraq óńdeý quraldary bar. Ákimdikterdiń málimetinshe, tehnıkanyń daıyndyǵy shamamen 80% quraıdy, jappaı egis jumystarynyń bastalýyna tehnıka 100% daıyn bolady.
Azat Sultanov qatysýshylardy ASHTÓ arzandatylǵan dızel otynynyń qajetti kólemimen qamtamasyz etetinine sendirdi: qazirdiń ózinde respýblıka boıynsha 340,0 myń tonna jeńildikti dızel otynynyń qajettiligimen jıyntyq ótinim qalyptastyrylyp, Energetıka mınıstrligine jóneltý kestesin bekitken.
Sondaı-aq, ASHM oblys ákimdikterimen birlesip, MÓZ-den óńirlerge arzandatylǵan dızeldik otyn kólemin jóneltý boıynsha sharalar qabyldaıdy. Energetıka mınıstrliginiń aldyn ala aqparaty boıynsha, ótken jylǵy egin jınaý jumystaryndaǵydaı ASHTÓ úshin baǵa 250 t/lıtrdi quraıdy, bul naryqtaǵydan 15% -ǵa tómen.
ASHTÓ-ni aınalym qarajatymen qamtamasyz etý úshin «Keń dala» baǵdarlamasy boıynsha kóktemgi naýqandy qarjylandyrýǵa 140 mlrd teńge qarastyrylǵan, ol arqyly 3 200-den astam ASHTÓ-ni qamtý jáne shamamen 2 mln ga alqapta egisti qamtamasyz etý josparlanǵan.
Aıta keteıik, ótken jyly nesıeni uzartqan ASHTÓ-ge aıyppul sanksıalary qoldanylmaıdy. Forvardtyq satyp alý baǵdarlamasy jalǵasady, bul kem degende 194 AÓK sýbektisin qarjylandyrýǵa múmkindik beredi.
«Qurmetti áriptester, egis naýqanyn kedergisiz ótkizý jáne ótken jyldardyń tájirıbesi boıynsha týyndaǵan barlyq máselelerdi jedel sheshý maqsatynda barlyq múddeli taraptardyń qatysýymen Respýblıkalyq jedel shtab qurylady, onda problemalyq máseleler men olardy sheshý joldary qaralatyn bolady», - dep baıandamasyn túıindedi vıse-mınıstr.