Djennı Karınán G20 elderiniń biriniń áskerin basqarǵan alǵashqy áıel general atandy.
Kanada Qarýly kúshteriniń bas qolbasshysy qyzmetine el tarıhynda tuńǵysh ret áıel adam taǵaıyndaldy, dep habarlaıdy Almaty-akshamy.kz
Djennı Karınánnyń ásker salasynda jınaǵan aıtarlyqtaı tájirıbesi bar. Ol Kanada Qarýly kúshterindegi urys bólimshesin basqarǵan alǵashqy áıel boldy. Qyzmet barysynda Irak, Aýǵanstan, Sırıa jáne Bosnıa sıaqty elderde tapsyrmalar oryndaǵan. Sońǵy úsh jyl boıy ol 2021 jyly áskerdegi jynystyq qýdalaý janjalynan keıin qurylǵan Armıanyń kásibı minez-qulyq jáne mádenıet basqarmasynyń bastyǵy qyzmetin atqardy.
Kanadanyń premer-mınıstri Djastın Trúdo bul kúndi tarıhı dep sıpattap, Djennı Karınándy tek kanadalyqtarǵa ǵana emes, búkil álemge úlgi bolyp otyr dep atap ótti. Karınánnyń taǵaıyndalýy Kanadanyń áskerdegi genderlik teńdikti ilgeriletý jónindegi mindettemesin jáne joǵary áskerı laýazymdaǵy áıelder róliniń mańyzdylyǵyn kórsetedi.