Jalpyǵa birdeı deklarasıalaýdyń III kezeńi 15 qyrkúıekte aıaqtalady.
Kásipkerler, zańdy tulǵalardyń basshylary men olardyń jubaılary 15 qyrkúıekke deıin el aýmaǵyndaǵy jáne sheteldegi aktıvteri jóninde derek usynýy tıis, dep habarlaıdy Almaty-akshamy.kz
Jalpy alǵanda bıyl 2 mln 400 myń adam qamtylady. Ázirge onyń 1 mln-nan astamy ǵana usynǵan. Al deklarasıa tapsyryp úlgermegender nemese tapsyrýdan ádeıi jaltarǵandar jaýapqa tartylady. Aldymen olarǵa eskertý jasalady. Bir jyl ishinde taǵy qaıtalasa – 55 myń teńge kóleminde aıyppul tóleıdi.
«Jalpyǵa birdeı deklarasıadan qorqýdyń keregi joq. Sebebi osy deklarasıany birde tapsyrsańyz, ózińizdiń ashyqtyǵyńyzdy, taza bızneste júrgenińizdi, jasyryn bıznesińiz joq ekenin bildiredi. Ózińizdiń azamattyq prınsıpińizdi kórsetkenińiz bolyp sanalady», - dedi QR Qarjy mınıstriniń orynbasary Erjan Birjanov.