Qazaqstan fýtbol federasıasy fýtzaldan Qazaqstan ulttyq quramasynyń bas bapkeri Paýlo Rıkardo Kakamen seriktestikti ári qaraı jalǵastyrady, dep habarlaıdy aqshamnews.kz.
Jańa kelisimshart 2026 jyldyń sońyna deıin sozylady.
«Ózbekstanda ótken álem chempıonaty bizdiń komandanyń kez kelgen qarsylasqa qabiletti ekenin kórsetti. Týrnırdegi sátti óneriniń arqasynda bizdiń komanda álemniń úzdik bestigine endi. Sondaı-aq, dúbirli doda jastarymyzdyń áleýeti zor ekenin kórsetti. Bul elimizde fýtzaldyń durys damyp kele jatqanyn kórsetedi. Bas bapker Paýlo Rıkardo Kaka myrzanyń qosqan úlesi zor. Alda Lıtva men Latvıada ótetin Eýropa chempıonatynyń irikteý týrnıri. Bizdiń mindet – Eýronyń fınaldyq kezeńine shyǵý. Kaka bapkerdiń basshylyǵymen bizdiń jigitter osy maqsatqa jetý úshin bar kúsh-jigerin salatynyna kúmánim joq», – dedi Qazaqstan fýtbol federasıasynyń prezıdenti Ádilet Barmenqulov.
Paýlo Rıkardo Kaka alǵa joǵary maqsat qoıǵanyn atap ótti.
«Qazaqstan fýtbol federasıasy jáne Qazaqstan fýtzal qaýymdastyǵyna qoldaý kórsetip, senim artqany úshin alǵysymdy bildiremin. Qazaqstan quramasy tek eń joǵary maqsatty alǵa qoıady. Biz 2026 jylǵy Eýropa chempıonatyna joldama alý úshin bar kúshimizdi salamyz», – dedi Qazaqstan quramasynyń bas bapkeri Paýlo Rıkardo Kaka.
Eske sala keteıik, Paýlo Rıkardo Kaka Qazaqstan quramasyn 2018 jyldan beri jattyqtyryp keledi. Onyń jetekshiligimen bizdiń qurama 2021 jylǵy álem chempıonatynda tórtinshi oryn aldy, bul álem chempıonattaryna qatysý tarıhyndaǵy eń úzdik jetistik. Sondaı-aq Qazaqstan quramasy alǵash ret ÝEFA reıtıńinde ekinshi, FIFA reıtıńinde besinshi orynǵa kóterildi.