Radıoelektronıka jáne baılanys áskerı-ınjenerlik ınstıtýty kúzet rotasynyń alty sarbazy elimizdiń joǵary oqý oryndarynda tegin bilim alý quqyna ıe boldy. Olar jaýyngerlik jáne memlekettik-quqyqtyq daıyndyqta joǵary nátıje kórsetip, grantta oqý múmkindigine ıe boldy, dep habarlaıdy aqshamnews.kz.
Olardyń tórteýi osy atalǵan áskerı ınstıtýtqa, taǵy bireýi T.Ia.Bıgeldınov atyndaǵy Áýe qorǵanysy kúshteriniń áskerı ınstıtýtyna tússe, taǵy bireýi azamattyq joǵary oqý ornyna qabyldanatyn bolady. Granttardy bólý rásimi Qorǵanys mınıstrliginiń saıtyndaǵy «Srochnıkı 2.0» elektrondy platformasy arqyly onlaın rejımde ótti.
– Áskerı boryshymdy atqarý ómirimdegi mańyzdy kezeńderdiń biri boldy, minezim shyńdaldy, tózimdilikke úıretti. Grant ıegeri ataný – bilim alýǵa múmkindik qana emes, áskerı mindetimdi atqarý barysynda jumsaǵan kúsh-jigerimniń moıyndalýy dep bilemin, – dep óz qýanyshymen bólisti Halyqaralyq aqparattyq tehnologıalar ýnıversıtetine túsken qatardaǵy jaýynger Nurbolat Ashýov.
Sondaı aq, Radıoelektronıka jáne baılanys áskerı ınjenerlik ınstıtýty serjanttar men zapastaǵy ofıserlerdi daıarlaý baǵdarlamalary boıynsha aqyly oqytý úshin azamattyq joǵary oqý oryndarynyń stýdentterin qabyldaýda. Baǵdarlama boıynsha áskerı kafedrasy joq joǵary oqý oryndarynyń stýdentteri oqı alady. Zapastaǵy serjant ataǵyn alǵysy keletin stýdentter úshin oqý merzimi bir jyl, al onyń quny – 250 000 teńge. Zapastaǵy ofıser bolýdy josparlaǵandar 500 000 teńge tólep eki jyl oqýy kerek.