Kaıdzen júıesi – Japonıada keńinen tanylǵan, únemi jetildirý men tıimdilikti arttyrýǵa baǵyttalǵan basqarý fılosofıasy. Onyń ishinde Kanban ádisi -óndiristegi jumys prosesterin ońtaılandyrýǵa, ýaqyt pen resýrstardy tıimdi paıdalanýǵa múmkindik beretin qural. Bul ádis óndiristik kásiporyndarda, IT salasynda jáne bilim berý júıesinde keńinen qoldanylady.
Men 2023 jyly Brazılıa elinde tájirıbelik taǵylymdamadan ótip, álemdik deńgeıdegi óndiris oryndarynda qoldanylatyn Kaıdzen júıesiniń Kanban ádisin tereńirek meńgerip qaıttym. Taǵylymdama barysynda jergilikti zaýyttarda, kásiporyndarda osy ádistiń qalaı júzege asyrylatynyn óz kózimmen kórip, tájirıbeden óttim.
İs sapardan kelgennen keıin, kolej basshylyǵymen birlesip, Kanban ádisin oqý prosesine beıimdeýdiń joldaryn qarastyrdyq. Nátıjesinde, stýdentter óndiristik tapsyrmalardy oryndaý barysynda vızýaldy basqarý júıesin qoldanyp, jumys prosesterin tıimdi uıymdastyrýǵa múmkindik aldy. Bul tásil bilim alýshylarǵa tapsyrmalardy júıelep oryndaýǵa, ýaqytty tıimdi paıdalanýǵa jáne komandalyq jumysty jaqsartýǵa kómektesedi.
Bizdiń Almaty elektromehanıka kolejinde Kaıdzen júıesi ádisteri burynnan da ishnara qoldanylyp keledi. Bul júıeniń kolejde negizin qalaýǵa alǵash usynys bildirip, bastama kótergen «TOO Janser HR academy» dırektory, Executive MBA, PhD doktory, profesor, Qazaqstan Respýblıkasynyń Eńbek sińirgen energetıgi Qojabaev Haırýlla Baıdildáuly bolatyn. Ol Kaıdzen júıesi taqyrybynda bizdiń kolejde arnaıy semınar ótkizip, oqytýshylar men stýdentterge úzdik tájirıbelerdi tanystyrdy. Kolej basshylyǵy men Qojabaev Haırýlla Baıdildáulynyń qoldaýymen oqytýshylar arasynda da Kaıdzen júıesiniń negizgi qaǵıdattaryn nasıhattaý jalǵasýda.
Jalpy, kanban ádisi- jobalardy basqarý jáne óndiristik prosesterdi ońtaılandyrýǵa arnalǵan júıe. Bul ádis jumys aǵynyn rettep, ónimdilikti arttyrýǵa tıimdi kómektesedi. Kanban júıesiniń tórt negizgi qaǵıdasy bar, olardy qoldaný arqyly jumys prosesin tıimdi uıymdastyrýǵa bolatynyna kózim jetti.
Kanban júıesiniń tórt qaǵıdasyna toqtalar bolsam, olar:
1.Taqtada tapsyrmalardy kórsetý;
2. Oryndalýdaǵy jumysty shekteý;
3. Tapsyrmalardyń turaqty qozǵalýyn qamtamasyz etý;
4. Jumys prosesiniń erejelerin anyqtaý.
Dál qazirgi tańda, osy ádispen sheberhana jumystaryn júıege keltirip, oqý úderisine engizý arqyly stýdentterdiń tájirıbelik bilimin jetildirip, óndiristik daǵdylaryn damytýǵa at salysýdamyn. Bolashaqta bul ádistiń oqý prosesine tolyqtaı engizilip, kolej bilim alýshylarynyń eńbek naryǵynda básekege qabilettiligin arttyrýǵa yqpal etetinine senimdimin. Bul jańashyldyqty Almaty elektromehanıka kolejinde ǵana qoldanyp qoımaı, qala deńgeıinde Tehnıkalyq jáne kásiptik bilim berý uıymdaryna da taratyp, óz tájirıbemizben bólistik. Osy júıeni tıimdi júrgizý nátıjesinde aldaǵy ýaqytta óz salamyzda úlken jetistikterge jetetinimiz aıqyn.
Beısen Serik Berikuly
Almaty elektromehanıka kolejiniń
óndiristik oqytý sheberi