Eldegi áýe tasymaldarynyń sapasyn túbegeıli ózgertýge arnalǵan sıpattamalarǵa (Performance-Based Navigation, PBN) negizdelgen navıgasıa júıesi kezeń-kezeńimen engizilýde.
PBN zamanaýı spýtnıktik tehnologıalar men dálme-dál navıgasıalyq standarttardy paıdalanýǵa negizdeledi. Bul ushý ýaqytyn qysqartyp, otyn shyǵynyn únemdep, CO² shyǵaryndylaryn azaıtýǵa bolatyn tikeleı marshrýttardy ashýǵa múmkindik beredi. Osynyń bári – Qazaqstannyń avıasıa salasynyń turaqty damýy úshin jasalǵan áreket, dep habarlaıdy aqshamnews.kz.
Almaty, Óskemen jáne basqa da kúrdeli meteorologıalyq jáne geografıalyq jaǵdaılarda ornalasqan áýejaılar úshin bul júıe asa mańyzdy bolmaq. Navıgasıanyń jańa múmkindikteri shalǵaı óńirlerde de ushaqtardyń qaýipsiz ári tıimdi qonýyna jaǵdaı jasamaq.
Jańartylǵan áýe qozǵalysy qurylymy ushý qaýipsizdigin qamtamasyz etýmen qatar, áýe keńistigindegi ushý jıiligin arttyrady. Buǵan dıspecherler men jerústi ınfraqurylymyna artyq kúsh salmaı-aq qol jetkizýge bolady.
Atalǵan jobany «Qazaeronavıgasıa» Halyqaralyq azamattyq avıasıa uıymynyń (ICAO) usynymdaryna sáıkes, Azamattyq avıasıa komıtetimen, QR Kólik mınıstrligimen, Qazaqstannyń avıasıalyq ákimshiligimen, avıakompanıalarmen jáne halyqaralyq áriptesterimen birlesip atqaryp jatyr.
«Qazaeronavıgasıa» bas dırektory Nurjan Ahmetovtiń aıtýynsha, «PBN engizý – Qazaqstannyń aeronavıgasıalyq salasyn sıfrlyq transformasıalaýdyń mańyzdy kezeńi. Bul qaýipsizdik deńgeıin arttyryp qana qoımaı, zamanaýı halyqaralyq talaptarǵa saı bolýǵa múmkindik beredi».
Búgingi tańda PBN prosedýralary Astana, Almaty, Aqtaý, Atyraý, Óskemen jáne Úsharal áýeaılaqtarynyń termınaldyq áýe keńistiginde engizilgen. 2025 jyly júıeni Balqash, Jezqazǵan, Qyzylorda, Úrjar jáne Shymkent áýeaılaqtaryna da ornatý josparlanyp otyr. 2030 jylǵa deıin elimizdiń taǵy 12 áýeaılaǵy qamtylatyn bolady.
PBN prosedýralary engizilgen termınaldyq keńistik pen áýeaılaqtarda navıgasıanyń artyqshylyqtaryn biriktiretin, sıpattamalar (PBN) men dástúrli navıgasıaǵa negizdelgen aralas model iske asyrylatyn bolady. Mundaı tásil ulttyq áýe keńistigi men qoldanystaǵy áýe kemeleri parkiniń erekshelikterin eskere otyryp, qaýipsizdikti jáne tıimdilikti barynsha kúsheıtýge múmkindik beredi.