QR Bilim jáne ǵylym mınıstrligi eldegi kolejderde syrttaı oqýǵa arnalǵan biliktilik tizimin aıtarlyqtaı qysqartty, dep habarlaıdy Almaty-akshamy.kz.
Salystyrmaly túrde aıtar bolsaq, eki jyldan astam ýaqyt buryn 595 biliktilik boıynsha syrttaı bilim alýǵa bolatyn. Endi stýdentter 53 biliktilik boıynsha bilim ala alady.
Syrttaı oqý stýdentterge sapaly daǵdylardy bermeıtindikten, mınıstrlik olardy qysqartý boıynsha kezeń-kezeńimen jumys júrgizdi. Bul joly syrttaı oqý «Quqyq», «Bilim berý», «Servıs, ekonomıka jáne basqarý» jáne basqa da kadrlardy daıarlaý beıinderi boıynsha alynyp tastaldy.
«Búgingi tańda tehnıkalyq jáne kásiptik bilim berý salasyndaǵy kadrlardy daıarlaýǵa qoıylatyn talaptardy eńbek naryǵy men jumys berýshiler belgileıdi. Ol úshin biz syrttaı oqý túrinen bas tartyp jatyrmyz. Sondaı-aq mundaı sheshimdi qabyldaýǵa túlekterdiń oqýdy bitirgennen keıin alatyn bilim men daǵdylarynyń jetkiliksiz sapasy sebep boldy. Kolejder stýdentterge jumys ornynda bilim alýǵa múmkindik beretin iri kásiporyndarmen jáne bıznespen tyǵyz baılanysta jumys isteıdi. Iaǵnı bul - oqytýdyń dýaldy formasy. Bul búginniń ózinde bilim sapasyna oń áserin tıgizip keledi. Syrttaı oqytý tiziminen talap etilmegen biliktilikter, onyń ishinde daıyndyq sáıkestigin eskere otyryp, bireýine biriktirilgender alynyp tastaldy. Jalpy, biz qysqartý jumystaryn ári qaraı jalǵastyramyz», - dep atap ótti QR BǴM Tehnıkalyq jáne kásiptik bilim departamentiniń dırektory Nasymjan Ospanova.