2022 jylǵy 1 qańtardaǵy jaǵdaı boıynsha 6 293 aýyldy eldi meken bar, olarda 7,8 mln turǵyn turady
Qazaqstannyń aýyldaryndaǵy 6 293 eldi mekende 7,8 mln adam turady. Bul týraly Májilistegi Úkimet saǵatynda «Aýyl — El besigi» jobasyn talqylaý kezinde Ulttyq ekonomıka mınıstri Álibek Qýantyrov málim etti, dep habarlaıdy Almaty-akshamy.kz.
«Memleket basshysynyń tapsyrmasyna sáıkes, aýyldyq aýmaqtardy damytý maqsatynda Ulttyq ekonomıka mınıstrligi «Aýyl — El besigi» jobasyn júzege asyrý boıynsha josparly jumystardy júrgizip jatyr. Jobanyń maqsaty – ınfraqurylymdy jańǵyrtý, ony jańa óńirlik standarttar parametrlerine deıin jetkizý arqyly aýyl turǵyndarynyń ómir súrý sapasyn jaqsartý. Bul maqsatqa qol jetkizý áleýmettik jáne ınjenerlik ınfraqurylymdy damytý jónindegi mindetterdi iske asyrý, aýyl turǵyndary úshin áleýmettik qyzmetterdiń qoljetimdigin qamtamasyz etý, jalpy alǵanda, ómir súrýge qolaıly jaǵdaý jasaý arqyly iske asyrylady. Aýyldardyń jalpy sanynan damý áleýeti bar 3,5 myń aýyl tańdaldy. Olarda aýyl turǵyndarynyń 89 paıyzy turady. Osy 3,5 myń aýyldyń 1171-i tirek aýyly jáne olardyń aınalysynda 2368-i jaqyn spýtnık aýyl», - dedi Á. Qýantyrov.
Ol osy aýyldardy damytý «Aýyl-El besigi» jobasy aıasynda birinshi kezektegi másele retinde júzege asyrylyp jatqanyn atap ótti.
«2022 jylǵy 1 qańtardaǵy jaǵdaı boıynsha, 6 293 aýyldy eldi meken bar, olarda 7,8 mln turǵyn turady. Bul rette 4,4 myń aýyl ortalyqtandyrylǵan sýmen qamtylǵan», - dedi mınıstr.