Almatyda memlekettik jáne aımaqtyq nesıeleý baǵdarlamalaryn júzege asyrý sheńberinde bir jylǵa mejelengen 3440 adamnyń ornyna 3688 jańa jumys orny (107,2%) ashyldy. Bul – jyl qorytyndysy úshin úlken jetistik.
2021 jylǵa arnalǵan nesıeleý baǵdarlamalarynyń búdjeti 47,3 mlrd. teńge. Bul ótken jylmen salystyrǵanda 49%-ǵa artyq (2020 j. – 31,8 mlrd. teńge.), onyń ishinde jergilikti búdjet qarajaty – 28,9 mlrd. teńge, respýblıkalyq búdjet qarajaty 18,4 mlrd. teńgeni qurady. Búdjettiń 58%-y sýbsıdıalaý jáne kepildik berý quraldaryna, al 42%-y nesıe berýge týra keldi. Bıznesti qoldaýdyń memlekettik jáne óńirlik baǵdarlamalary aıasynda jalpy nesıe somasy 278,4 mlrd. teńgeni quraıtyn 3 212 joba qarjylandyryldy.
«Jalpy, qala bıznesi memlekettik qoldaýdyń barlyq sharasyn belsendi qoldanady. Máselen, eger 2018-2019 jyldary negizinen iri jáne orta kásiporyndar qarjylandyrylǵan bolsa, endi ótken jyldan bastap BJK-nyń mıkro jáne shaǵyn bıznesti qoldaý, sondaı-aq baǵdarlamalarǵa ózgerister engizý boıynsha birinshi baǵytyn engizýdiń arqasynda mıkro jáne shaǵyn bıznesti qarjylandyrý boıynsha belsendi ósim baıqalady. Sanattar boıynsha bıyl barlyq jobanyń jartysynan astamyn shaǵyn bıznes quraıdy (56%). Salalar bólinisinde negizgi úles ónerkásipke (35%) jáne kólikke (13,1%) tıesili. Aýdandar boıynsha qarjylandyrylǵan jobalardyń eń kóbi megapolıstiń Áýezov (17%), Almaly (16,7%), Bostandyq (14,5%) jáne Alataý (14,2%) aýdandarynda tirkeldi», – dedi Almaty qalasy ákiminiń orynbasary Maqsat Qıqymov.
«BJK– 2025» baǵdarlamasyna bıyl 184,6 mlrd. teńge nesıe somasyna 2 815 joba qarjylandyryldy, ıgerilýi 100%-dy quraıdy. Onyń ishinde 231 jobaǵa bólingen qaıtarymsyz ınovasıalyq granttyń jalpy somasy 690 mln. teńge. «BJK – 2025» boıynsha jobalardyń eń kóp sany kelesi salalarda qarjylandyryldy: kólik jáne qoımalaý – 19,1%, saýda jáne qyzmetter – 18,9%, al ónerkásip – 14,3%.
Memlekettik baǵdarlamalar aıasynda: «Qarapaıym zattar ekonomıkasy» – 41,7 mlrd. teńge nesıe somasyna 28 joba, «AÓK» – 36,2 mlrd. teńge somasyna 15 joba, «Eńbek» – 1,5 mlrd. teńgege 102 joba qarjylandyryldy. Óńirlik baǵdarlamalar aıasynda: «Almaty Business» boıynsha – 8,9 mlrd. teńgege 119 joba, «Almaty Business – 2025» boıynsha 5,5 mlrd. teńgege 133 joba qarjylandyrylǵan.
Qala shetinde órkendep kele jatqan bıznesti qoldaý da mańyzdy baǵyttardyń biri bolyp tabylady. Baǵdarlama iskerlik belsendiligi tómen aýdandarda keńirek tanyla bastady, oǵan qalanyń 5 aýdany (Alataý, Áýezov, Jetisý, Naýryzbaı, Túrksib) kiredi. Búginde atalǵan aýdandarda 3,3 mlrd. teńgeden astam somaǵa 74 joba qarjylandyrylǵan.