Qyzylordadaǵy balabaqshada osydan úsh aı buryn tárbıeshi men onyń kómekshisiniń salǵyrttyǵynan eki jasar Erkejannyń sol jaq aıaǵyn kúıik shalǵan. Búldirshinniń anasy Aınur Aqshamnews.kz redaksıasyna hat jazyp, oqıǵanyń mán-jaıyn aıtyp berdi.
22 mamyrda tústen keıin Aınurǵa balasynyń tárbıeshisi habarlasyp, «qyzyńyz aýyryp qaldy» dep jetkizgen. Tańerteń saý ketken balanyń jaǵdaıyn suraǵan anaǵa olar «kúıip qaldy» dep jaýap berip, tez jetýin ótingen.
Janushyra jetken Aınur balasynyń sol jaq aıaǵyn qatty kúıip qalǵanyn kóredi. Bizge jibergen sýretterine qaraǵanda, ol abaısyzda kúıip qalǵanǵa uqsamaıdy. Anasynyń aıtýynsha, tárbıeshiler jedel járdemdi de ýaqytyly shaqyrmaǵan, sebebi «aldymen anasynan ruqsat alý kerek» dep kútken. Nátıjesinde, balaǵa alǵashqy medısınalyq kómek oqıǵa bolǵannan keıin úsh saǵattan soń biraq kórsetilgen.
«Men balabaqshaǵa kirip, balany kórgen kezde ol jatyr eken. Tipti jylaıtyn shamasy joq. Dirildep jatty. Shok alyp qalǵan», - deıdi anasy.
Dárigerler Erkejanǵa 1-shi, 2-shi, 3-shi «A» dárejeli kúıik jáne kúıikten alynǵan shok degen dıagnoz qoıǵan. Satýrasıasy tómendegen bala shuǵyl túrde reanımasıaǵa jatqyzyldy. Ol jerde úsh kún jatyp, jalpy palatada 21 kún emdelgen. Osy ýaqyt ishinde Erkejanǵa 5 ret narkoz jasalyp, birneshe ret qan quıylǵan.
Sýret: Erkejannyń anasy Aınur Aıdarbekovanyń redaksıaǵa joldaǵan sýreti
Qazir balanyń jaǵdaıy turaqtalǵanymen, aıaǵynda kúıik izderi ketpegen. Búldirshin kúndiz oınap júrgenimen, túnde mazasyzdanady, teriniń qyshýyna baılanysty dári-dármeksiz uıyqtaı almaıdy.
Anasynyń talap-tilegi
Erkejanǵa eshqandaı materıaldyq ne moraldyq kómek kórsetilmegen. Kináliler jábirlenýshige aqsha usynǵan. Biraq ony «aryzdan bas tartý shartymen» ǵana beretinin aıtqan. Anasy Aınur buǵan kelispeı, aqshany qabyldamaǵan.
«Meniń bar tilegim tergeý shynaıy júrgizilip, kináliler zań boıynsha jazasyn alsa deımin», – deıdi jábirlenýshiniń anasy.
Balabaqshanyń jaýaby
Redaksıa oqıǵa qalaı bolǵanyn bilý úshin balabaqshaǵa habarlasyp, meńgerýshimen sóılesti.
Olardyń aıtýynsha, tárbıeshi men onyń kómekshisi balany «qol jýǵyshqa (rakovına) eńkeıtip, basyn jýmaq bolǵan kezde baıqamaı aıaǵyn kúıdirip alǵanyn» aıtqan. Alaıda anasynyń sózinshe, qol jýǵyshtyń ólshemine balanyń tipti basy syımaıdy, sondyqtan bul túsinik qısynsyz.
Oqıǵa bolǵan kúni qylmystyq is qozǵalǵan. Birinshi sot-medısınalyq saraptama «densaýlyqqa aýyr zıan keldi» degen qorytyndy shyǵardy. Ekinshi saraptamanyń nátıjesinde de kúıik alý múmkindigi rastalǵan. Biraq tergeý isi áli tolyq aıaqtalǵan joq.
Qazir Erkejan baryp júrgen jekemenshik balabaqsha jumysyn toqtatqan. Balabaqsha meńgerýshisi bul aqparatty rastady. Ol balanyń aıaǵyn kúıdirip alǵan eki qyzmetker jumystan arnaıy "bappen" shyǵarylǵanyn habarlady. Iaǵnı, olar endi bul salada qyzmet ete almaıdy.
Polısıa ne deıdi?
Redaksıaǵa hat joldaǵan Erkejannyń anasy qylmystyq istiń tergeýi de uzaqqa sozylyp ketkenine alańdap otyr. Osy istiń qalaı júrgizilip jatqany jaıly tolyǵyraq bilý úshin Qyzylorda oblysy Polısıa Departamentine arnaıy saýal joldadyq.
Resmı túrde joldaǵan hatymyzǵa jaýapty organnan mynandaı jaýap keldi:
«22.05.2025 jyly bolǵan derek boıynsha Qazaqstan Respýblıkasy Qylmystyq kodeksiniń 141-babynyń 1-bóligimen (Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý) SDTTBT-ne qylmystyq is tirkelgen.
Qazir tıisti saraptamalar taǵaıyndalyp, tergep-tekserý áreketteri júrgizilip jatyr. Tergep-tekserý nátıjesimen qysqa merzim ishinde qylmystyq iske qatysýshy árbir turǵanyń is-áreketine quqyqtyq baǵa berilip, qylmystyq iske sheshim qabyldatyn bolady. QR QPK-niń 201-babynyń talabyna sáıkes ózge tergeý málimetteri jarıalanýǵa jatpaıdy».
Alaıda polısıa tergeý qaı ýaqytta aıaqtalatyny, sheshim qashan shyǵarylatyny týraly naqty aqparat bergen joq. Bul is redaksıa baqylaýynda.
Eske salaıyq, buǵan deıin almatylyq ata-ana qyzynyń balabaqshada taıaq jegenine shaǵymdanǵanyn habarlaǵan edik.