Taraptar halyqaralyq qurylymdar aıasyndaǵy yqpaldastyq jóninde pikir almasty, dep habarlaıdy aqshamnews.kz
Prezıdent Qasym-Jomart Toqaev pen mınıstr Takeshı Ivaıa saýda-ekonomıkalyq, ınvestısıalyq, kólik-tranzıt jáne mádenı-gýmanıtarlyq salalardaǵy qazaq-japon keńeıtilgen strategıalyq seriktestiginiń qazirgi jaı-kúıi men damý perspektıvasyn talqylady.
Qasym-Jomart Toqaev Japonıa syrtqy saıasat vedomstvosynyń basshysyna iltıpat bildire otyryp, onyń Astanaǵa sapary eki el arasyndaǵy qarym-qatynasty arttyrýǵa tyń serpin beretinin atap ótti.
– Japonıa – Azıadaǵy senimdi ári jaqyn seriktesimiz. Biz Tokıomen jan-jaqty yntymaqtastyqty nyǵaıtýǵa erekshe mán beremiz. Premer-mınıstr Ishıbaǵa ystyq yqylasymdy jetkizýdi suraımyn. Premer-mınıstr Shıgerý Ishıba Qazaqstanǵa resmı saparmen kelmekshi. Biz onyń saparyn asyǵa kútip, daıyndalýdamyz. Ózara qarym-qatynasymyz joǵary qarqynmen damyp kele jatyr dep senimmen aıtýǵa bolady, – dedi Prezıdent.
Takeshı Ivaıa qonaqjaılyq tanytqany úshin Qazaqstan Prezıdentine rızashylyǵyn bildirdi.
– Sizdiń sálemińizdi Premer-mınıstrimizge mindetti túrde jetkizemiz. Qazaqstan men Japonıa – halyqaralyq tártipti kúsheıtýge múddeli strategıalyq seriktester. Meniń bul saparym eki el arasyndaǵy baılanysty odan ári damytýǵa jol ashady dep oılaımyn, – dedi Japonıa Syrtqy ister mınıstri.
Sonymen qatar Qasym-Jomart Toqaev pen Takeshı Ivaıa halyqaralyq jáne óńirlik kún tártibindegi ózekti máseleler jóninde áńgimelesti.