Qazaqstan jyl basynan beri Reseı, Qyrǵyzstan jáne Aýstralıanyń quzyretti organdarymen birlesip esirtkige qarsy 47 operasıa ótkizdi.
UQK málimetinshe, operasıalar nátıjesinde esirtki tasymalynyń 8 halyqaralyq jáne 14 óńirlik arnalary joıyldy, dep habarlaıdy Almaty-akshamy.kz.
«Atap aıtqanda, Aýǵanstannan Qazaqstanǵa kontrabandalyq jolmen 5 kg geroın jáne 48 kg metamfetamın jetkizýdi uıymdastyrǵan sheteldik azamat ustaldy. Aýǵan opıattaryn esirtki trafıkterin qalyptastyrý elderinen Qazaqstanǵa kontrabandalyq jolmen tasymaldaýǵa qatysy bar esirtki toby áreketiniń joly kesildi. 1 kg geroın, 2 kg apıyn jáne 14 kg gashısh tárkilendi», – delingen habarlamada.
Sondaı-aq, Kaspıı sý aıdyny arqyly Irannan Qazaqstanǵa opıattardy jetkizýdiń turaqty arnasy joıyldy. Jyldam qaıyqtardy paıdalanyp, kontrabandalyq jolmen 30 kg apıyn jáne 100 metadon tabletkalaryn jetkizgen tórt sheteldik ustaldy.
Bıylǵy jyldyń birinshi toqsanynyń ózinde 8 aýqymdy esirtki zerthanasy joıylyp, zańsyz aınalymnan 73 kg «mefedron» jáne 223 kg «α-PVP» psıhotroptyq zaty alyndy.
«Eger buryn sıntetıka óndirisi Almaty jáne soltústik oblystarǵa tán bolsa, búginde olardyń ornalasýy birtindep basqa aımaqtarǵa taralýda. Mysaly, Túrkistan oblysynda kórshi elderdiń esirtki naryǵyna jetkizýge arnalǵan psıhotroptyq zattardyń sheteldikter uıymdastyrǵan aýqymdy óndirisiniń áreketi toqtatyldy. Sondaı-aq, Shymkent qalasy men Jambyl oblysynda óz ónimderimen ishki esirtki naryǵyn qamtamasyz etip kelgen iri esirtki zerthanalary tabyldy. Atalmysh «dızaınerlik esirtkilerdi» óndirý alańdarynyń ornalasýy men satylýy boıynsha elimizdiń megapolısteri áli kúnge deıin aldyńǵy qatarda ekenin aıtyp ótý kerek», – dep málim etti UQK.
Jyl basynan beri esirtki qurylymdarynyń 67 qatysýshysy ustalǵan. Zańsyz aınalymnan 483,2 kg psıhotroptyq zattar, 11 kg geroın, 32,8 kg apıyn, 63,7 kg gashısh, 41,6 kg marıhýana jáne 17 tonnadan astam kóknár shıkizaty, sondaı-aq 22 tonnadan astam hımıalyq reagentter alyndy.