Almaty qalasy ákimdiginiń qoldaýymen, Neapol (Italıa) qalasynda Almaty qalasy tarıhy mýzeıiniń Qazaqstan Respýblıkasynyń Italıadaǵy Elshiligimen birlesip uıymdastyrylǵan «Qazaqstan kóshpendileri: tarıhy men búgini» atty kórmesi ashyldy.
Ashylý saltanatyna TURKSOY halyqaralyq uıymynyń Bas hatshysy Sultan Raev, QR-nyń Italıadaǵy Tótenshe jáne ókiletti elshisi Erbolat Sembaev, Neapol qalasynyń meri Gaetano Manfredı, QR-nyń Italıadaǵy Qurmetti konsýly Valentına Massa hanym jáne basqa da resmı tulǵalar qatysty. Qyzyqty artefaktilerden basqa, qonaqtarǵa qazaq halqynyń ulttyq taǵamdary usynyldy.
Qazaqstan men Italıany tek saıasat pen ekonomıka ǵana emes, sonymen qatar Uly Jibek joly dáýirinen bastaý alǵan tarıh pen áıgili venesıalyq kópes Marko Polonyń Uly dalanyń sheksiz keńistigi arqyly jasaǵan saıahattary jaqyndastyrady. Italıamen dıplomatıalyq qatynastar 1992 jyly 21 tamyzda ornaǵan. Qazaqstannyń Italıadaǵy mádenıet kúnderi alǵash ret 2013 jyly ótkizildi. Qazaqstan mádenıetin álemdik mádenı keńistikke ıntegrasıalaýdyń mańyzy zor, óıtkeni bul qundylyqtar almasýǵa, mádenı ártúrlilikti keńeıtýge jáne halyqtar arasyndaǵy ózara túsinistikti nyǵaıtýǵa yqpal etedi.
Al atalmysh kórmeniń maqsaty – Qazaqstan men Italıa arasyndaǵy mádenı baılanystardy odan ári nyǵaıtý, sondaı-aq Uly dala halqynyń tarıhymen, kóshpendiler mádenıetimen, atap aıtqanda kóshpeli qazaqtardyń dástúrlerimen, turmysymen, fılosofıasymen jáne dúnıetanymymen tanystyrý.
Neapol qalasynyń Castel Nuevo qamalynda uıymdastyrylǵan «Qazaqstan kóshpendileri: tarıhy men búgini» kórmege birlestik qorynan 140-tan astam eksponat qoıyldy. Birlestik mýzeıleriniń qory men koleksıalary únemi jańa artefaktilermen tolyqtyrylyp otyrady. Bizdiń mýzeıler tarıhı jádigerlerdi saqtap jáne nasıhattap qana qoımaı, ǵylymı-bilim berý ortalyqtarynyń qyzmetin de atqarady.
Kórme ótip jatqan jerdiń tarıhy da qyzyqty. Castel Nuevo (Anjýı qamaly) – Anjýılyq Charlz I-niń qurmetine salynǵan saraı. Ol Neapol qalasynyń ortalyǵynda ornalasqan. Shetelden týrıser eń kóp baratyn oryndardyń biri. Ǵımarattyń bıiktigi 50 metrden asady.
– Almaty qalasy mýzeıler birlestigi Qazaqstannyń qoǵamdyq jáne mádenı ómirine belsendi qatysyp júr. Onyń úlesinde 2022-2023 jyldary erekshe damyǵan halyqaralyq yntymaqtastyqtyń keń baǵdarlamasy bar. Máselen, buǵan deıin Seýl (Koreıa Respýblıkasy), Stambýl (Túrkıa) qalalarynda úlken jetistikpen ótkizilgen halyqaralyq kórmelerdi ataýǵa bolady. Bizdiń shahardan Italıa tórine jetkizilgen qundy jádigerler arasynda kıiz úı jabdyqtary, at ábzelderi, turmystyq zattar, zergerlik buıymdar, mýzykalyq aspaptar bar. Italıa kórermenderiniń yqylasy keremet! Olar bizdiń jádigerlerdi bir aı boıyna tamashalaı alady, – deıdi Almaty qalasy mýzeıler birlestiginiń dırektory Lázzat Saǵyndyqova.