Qazaqstanda jyl basynan 23 esirtki zerthanasy anyqtaldy
Bul týraly İshki ister mınıstrligi baspasóz qyzmetiniń ókili Shuǵyla Turlybek málim etti, dep habarlaıdy Almaty-akshamy.kz
Vedomstvo dereginshe, jyl basynan beri polısıa qyzmetkerleri 23 esirtki zerthanasyn anyqtaǵan. Jalpy, bıyl zańsyz aınalymnan 110 keliden astam sıntetıkalyq esirtki tárkilendi. İshki ister mınıstrliginiń málimetine saı, bul byltyrmen salystyrǵanda eki ese kóp.
Sh.Turlybek esirtki zerthanasyn uıymdastyryp, keıin elden qashpaq bolǵan kúdikti týraly aıtyp berdi.
«Maýsym aıynyń sońynda polısıa qyzmetkerleri Almaty oblysynyń Azat aýylynda esirtki zerthanasyn joıdy. Kúdikti sıntetıkalyq esirtki jasaý úshin úıdi jalǵa alǵan. Ol quqyqqorǵaý organdarynan saqtaný úshin, uıaly telefon arqyly baqylaý múmkindigi bar jasyryn beınekameralar ornatqan. Qylmys bolǵan jerge sońǵy ret oralǵanda, polısıadan kúdiktenip, esirtki, hımıalyq zattar men jabdyqtardy tastap qashyp ketken. Barlyǵy 75 gramnan astam sıntetıkalyq esirtki, sondaı-aq psıhobelsendi zattardy sıntezdeý úshin paıdalanylatyn 4,5 keliden astam prekýrsor tárkilendi. Jınalǵan dálelder, úı ıesi men kórshilerdiń aıǵaqtary kúdiktiniń jeke basyn anyqtaýǵa múmkindik berdi. Aralasatyn ortasy, oǵan qatysty basqa da málimetter tekserilip, jıi bolatyn jerleri belgili boldy.
Kúdikti taǵy da bir esirtki óndirisin uıymdastyrýy múmkin bolǵandyqtan, polısıa qyzmetkerleri ony biraz ýaqyt baqylaýda ustady. Onyń elden qashý jospary belgili bolǵan soń, tártip saqshylary kúdiktini Eńbekshiqazaq aýdanynyń Aımen aýylynda ustady. Tintý barysynda odan 10 gram mefedron alyndy», - dedi Shuǵyla Turlybek.