Elde alaıaqtyq jasaý tyıylmaı tur
Júzden astam otandasymyz jumys istep jáne shetelde bilim alý úshin AQSH-qa barýdy josparlaǵan. Olar Almaty qalasyndaǵy vızalyq qoldaý kórsetetin jeke kompanıaǵa júginedi. Ózara kelisim jasap, barlyǵy qujattaryn tapsyrady. Biraq álgi mekeme aıaqastynan ushty-kúıli joq bolyp, biraz adam san soǵyp qalǵan, dep habarlaıdy Almaty-akshamy.kz 24.kz saıtyna silteme jasap.
Shetelde bilim alý jáne jumys isteýdi kózdegen Danıar Toqbergenov te jeke kompanıa ókilderine aldanyp qalǵandardyń biri. Aıtýynsha, vızalyq qoldaý ortalyǵy basshysy eki aıdan beri ustatpaı júrgen kórinedi.
«Men suraǵan aqshasyn berdim. 428 myń teńgege arnaıy shart jasastyq. Eki aı ishinde Amerıkalyq ýnıversıtetten shaqyrtý aldym. Taǵy 500 myń ber dedi, suraǵanyn jiberdim. Tólemnen keıin olar konsýlmen suhbat bolatynyn aıtty. Mine, sodan beri qanshama ýaqyt ótti. Habar-osharsyz joǵaldy. Aqsham da, vıza da joq», - deıdi qala turǵyny Danıar Toqbergenov.
Sheteldi ańsaǵan jastyń biri – Adel Amanova. Aıtýynsha, tek ózi ǵana emes, taǵy 100 shaqty adam osy kompanıa aldaýyna túsken. Olardyń jalpy shyǵyny 10 mıllıon teńgeden asady. Ol shıkiliktiń baryn sezgen sátte bári kesh edi. Sebebi aqshany alǵandar izin sýytqan. Áleýmettik jeliden ózi ispettes aldanǵandardy taýyp, polısıaǵa aryzdanypty.
Atalǵan kompanıa ókilderi resmı jaýap berýden bas tartqan. Quzyrly organdardyń aıtýynsha qazir sotqa deıingi tergeý «Alaıaqtyq» baby boıynsha qozǵalǵan. Aldanǵan adamdar aqshany qaıtaryp qana qoımaı, sonymen birge osy iske qatysy bar barlyq jaýaptylardyń qylmystyq jaýapkershilikke tartylǵanyn suraıdy.
«Qazir sotqa deıingi tergep tekserý júrgizilip jatyr. Osy ýaqytqa deıin 40 adam aryzdandy. Kúni keshe eki kúdikti is boıynsha qamaýǵa alyndy», - deıdi qalalyq Polısıa departamentiniń resmı ókili Saltanat Ázirbek.