Bıyl qazaqtyń qara óleńin kıe tutqan, asyl jyrlarymen qalyń jurtshylyqtyń mahabbatyna bólengen aqyn Jambyl Jabaevtyń týǵanyna 175 jyl. Ataýly mereıtoı jáne Qala kúni qarsańynda Almaty qalasy qoǵamdyq damý basqarmasy «Rýhanı jańǵyrý» jobalyq keńsesiniń uıymdastyrýymen «Júz jasaǵan Jambyl» Open Air jobasy aıasynda birqatar is-sharalar ótti.
Shara qaladaǵy Jambyl Jabaev eskertkishi aldyndaǵy ashyq alańda «Jyr alyby Jambyl» atty Jambyl oqýlarymen bastaldy. Qala mektepteriniń oqýshylary sóz óneriniń sheberi Jambyl Jabaevtyń óleńderin mánerlep oqydy.
«Rýhanı jańǵyrý» jobalyq keńsesiniń resmı ókili Gúlsim Saǵatbaıqyzynyń aıtýynsha, qala mektepteriniń oqýshylary, jalpy, óskeleń urpaq Jambyl aqynnyń mereıtoıynda ǵana emes, basqa ýaqytta da uly esimdi dáriptep, óleńderin jatqa bilý kerek. Jambyl oqýlaryna qatysqan sóz ónerin túsinetin oqýshylar barda aqynnyń murasy máńgilikke saqtalady.
Danıar ÁLIEV, Almaty qalasy mádenıet basqarmasy basshysynyń orynbasary:
- Uly Jambyldyń shyǵarmashylyq murasyn, ónegeli ómirin nasıhattaý maqsatynda qalalyq orta bilim oqýshylary arasynda ótken shyǵarmashylyq is-sharany Almaty qalasy ákimdigine qarasty «Rýhanı jańǵyrý» jobalyq keńsesi uıymdastyrdy. Osyndaı rýhanı sharalar arqyly Jambyl Jabaevtyń shyǵarmashylyǵymen árbirimiz tanys bolýymyz kerek. Aqynnyń rýhty kóteretin, Otanǵa degen mahabbatty, elge degen súıispenshilikti arttyratyn óleńderi arqyly jastardyń boıyna rýhty qasıetterdi sińirgen jón.
Sonymen qatar, Ǵ.Músirepov atyndaǵy Qazaq akademıalyq balalar men jasóspirimder teatry aldyndaǵy ashyq alań sahnasynda jas aqyndardyń qatysýymen «Jambyl – meniń jaı atym...» atty aıtys ótti. Jobanyń negizgi maqsaty – Uly Jambyldyń shyǵarmashylyq baı murasyn keń kólemde nasıhattaý, búgingi óskeleń jas urpaqtyń aıtys óneri arqyly patrıottyq sezimin oıatyp, otansúıgishtikke baýlý. Aıtysqa túrli jas aqyndar aıtysynyń júldegerleri qatysty.
Búgingi is-shara «Júz jasaǵan júrekten...» atty teatrlandyrylǵan qoıylymmen aıaqtaldy. Qoıylymdy Ǵ.Músirepov atyndaǵy Qazaq akademıalyq balalar men jasóspirimder teatrynyń akterleri, stýdentter men jas akterler qoıdy.
Darhan BALAJANOV, joba uıymdastyrýshysy:
- Negizgi maqsat – Jambyldyń jyryn keńinen nasıhattaý. Open Air jobasy aıasynda ashyq aspan astynda úsh joba ótkizildi. Onyń biri – qoıylym. Teatrlandyrylǵan qoıylymda aqynnyń ómirin kezeń-kezeńimen kórsettik. Iaǵnı dúnıege kelgen kezeńi, bozbala shaǵy, Súıinbaıdan bata alatyn kezi, Aıkúmispen aıtysy bar. Sońynda toqsandy alqymdaǵan Jambylmen qoıylymdy aıaqtaımyz. Shaǵyn qoıylymda aqynnyń ómirin qamtýǵa tyrystyq. Sonymen qatar, aqynnyń el-jurtyna aıtqan óleńderi men ósıetterin kiristirdik.