Almaty qalasynyń ákimi Baqytjan Saǵyntaev megapolıs ekonomıkasyn, kásipkerlikti damytýdy, SHOB ókilderine qoldaý kórsetýdi jáne myńdaǵan jumys orny qurylatyn Indýstrıaldy aımaqtyń mańyzdylyǵyn únemi atap ótedi.
Almaty – kásipkerliktiń qazany qaınaǵan múmkindikter qalasy. Munda iri ónerkásipten bastap, shaǵyn jáne orta bıznestiń túrli nysandary shoǵyrlanǵan. Ońtústik astananyń ındýstrıalyq aýmaǵynda jyl sońyna deıin 823 jumys ornyn quraıtyn 40,3 mlrd. teńgege 9 joba iske asatyn bolady. Ásirese, qazaqstandyq ónim shyǵarýshy kompanıalarǵa túrli jeńildikter qarastyrylǵan. Mysaly, 2019 jyly «Damý» qorynyń dástúrli óndirýshiler kórmesine qatysqan «RISMI group» kompanıasy - qazirgi tańda Qazaqstan aýmaǵynda aerozol ónimderin shyǵaratyn jalǵyz kásiporyn. Bolashaqta olar avtokólik baǵyty boıynsha taýar pozısıalarynyń 30-dan astam ataýyn shyǵarýdy josparlaýda. Qazirdiń ózinde taýarlardyń 17 túri shyǵarylady, qalǵan 13 pozısıa 2021 jyldyń sońyna deıin óńdeletin bolady.
İndet pen mindet
Qandaı bıznes túri bolmasyn, táýekelder oryn almaı qoımaıdy. Ásirese, búkil elimiz boıynsha tótenshe jaǵdaıdyń jarıalanýy qarapaıym adamdarǵa ǵana emes, bıznes nysandaryna da úlken soqqy boldy. Tutynýshylar qaýymy tek jeke tulǵalardan turatyn jas kompanıa da bul tyǵyryqtan shyǵatyn joldardy izdeý qıynǵa soqqanyn aıtady. Tipti, qyzmetkerlerdi taratýǵa týra kelgen, biraq basshylyq eshkimdi jumystan shyǵarmaǵan. Áıteýir, bir aıdan keıin óndiristi jalǵastyrýǵa ruqsat berilip, burynǵy jumys rejımi qalypqa kelgen. Sondaı-aq, óndiris Almaty qalasynan 50 shaqyrym jerde ornalasqandyqtan, qyzmetkerlerdi tasymaldaý úshin jolaýshylar "Gazeli" satyp alyndy, karantındik sharalarǵa sáıkes jumys oryndary daıyndaldy.
Óndiris qarqyny
Qazir kompanıanyń balansynda aerozol ónimderin shyǵaratyn úsh jeli bar, úsheýi de tolyqtaı iske qosylǵan. Bir jeliniń qýattylyǵy – bir túrdegi ónimniń 3000 danasy. Óndiris menshigindegi zaýytta 50-den astam adam jumys isteıdi. Barlyq qyzmetkerler qaýipti komponenttermen jumys isteý úshin arnaıy oqytýdan ótken, ony dáleldeıtin kýálikteri bar. Jalpy, satylymǵa usynylatyn taýarlardyń arasynda aerozol ónimderiniń 25 pozısıasy, 20 eritkish jáne 20-dan astam avtoparfúm túrleri bar. Qazaqstan halqy taýardy kez kelgen qaladan satyp ala alady. Sondaı-aq, ónimdi taratý aýdany jyl sanap ulǵaıýda. Reseı men TMD qazirdiń ózinde bizdiń Almaty mańynda shyǵarylǵan otandyq taýardy paıdalanýda.
Atalǵan kompanıada 10-nan astam jetkizýshi bar. Olardyń ishinde biraz seriktes kompanıalarmen on jyldan astam ýaqyt birlesken jumystar júrgizilýde. Mysaly, reseılikterden joǵaryda atalǵan ónimderdi daıyndaýda asa qajetti hımıa alynady eken. Al Qytaıdan hımıanyń bir bóligi, negizinen jabdyqtar men búrikkish bótelkeler ákelinedi.
Tehnologıalyq úrdis formýlasy
Kompanıa aýdany 2350 sharshy metr bolatyn aerozol ónimderin shyǵaratyn óz zaýytyn iske qosqany buǵan deıin de habarlanǵan bolatyn. Onyń ishine ákimshilik ǵımarat, óndiriske arnalǵan 3 seh pen shıkizat pen daıyn ónimge arnalǵan birneshe qoıma, sonymen qatar, qospalarǵa arnalǵan birneshe rezervýarlar ornatylǵan. Ónimdi ázirleýmen kompanıa dırektorynyń ózi aınalysady, onyń ózindik ónim jasaý tehnologıasy bar. JSHS standarty boıynsha, dırektor barlyq sandar men proporsıalardy óndiriske tehnologqa beredi, ol óz kezeginde synaq danalaryn jasap, ónimdi synaıdy, taldaý júrgizedi. Barlyq synaqtardan ótkennen keıin ǵana tehnologıalyq prosestiń formýlasyn dırektor bekitedi. Eger synaq barysynda qandaı da bir ózgerister bolsa, aqparat dırektorǵa jiberiledi. Óz kezeginde oń ózgeristerdi basshylyq rastaǵan jaǵdaıda tehnologıalyq proses ári qaraı jalǵasyp, ónim óndiriske jiberiledi.
Qazaqstan naryǵynda 15 jyl, óndirýshi retinde 10 jyl eńbek etip kele jatqan bul óndiris oshaǵy taýarlardyń san túrliligimen, eń bastysy, qazaqstandyq brendtiń tanylýyna óz úlesin qosyp jatqan almatylyq bıznestiń áleýetiniń beınesine aınalyp otyr. Sońǵy ýaqyttary kompanıa ımporttyq shıkizattan tolyq bas tartýdy kózdep otyr. Munyń barlyǵy memlekettik, jergilikti bılik organdary men kásipkerlerdiń ózara túsinistikke qurylǵan tyǵyz jumysynyń arqasy.